Тун удахгүй “Содура” киногоор үзэгчидтэй уулзах гэж буй жүжигчин О.Амгаланбаатар цахим хуудсандаа ийн бичжээ. Шинэ залуу үеийн төлөөлөл болсон авьяаслаг залуусын нэг түүнийг чадварлаг жүжигчнээс гадна үзэл бодлоороо олонлогоос ялгардаг нэгэн гэлцдэг нь оргүй үг биш бололтой. Түүнийхээр Цэргийн баяр ийм учиртай гэнэ шүү.
94 жилийн өмнө энэ өдөр Монголын малчин, адуучин,лам гээд энгийн иргэдээс бүрдсэн 400 гаруй цэрэг Хятадын байнгын бэлтгэлтэй морьт цэргийн 25-р дивизийг Хиагтаас хөөн гаргаж эх орондоо тусгаар тогтнол, элгэн түмэндээ хэдэн зуун жил мөрөөдсөн эзэн байх эрхийг авчирч байжээ. Энэ бол 3 сарын 18-ны өдөр!!!
Гэнэт солгойръё. Манайхны шоколад, цэцгэнд бялуурч ач холбогдол өгдөг 3 сарын 8 буюу олон улсын эмэгтэйчүүдийн баяр. Энэ баярын гол утга нь сайхан эх хүн, бүсгүй хүн, удам залгах охин үр гэдгээ санаж сэрэх л санагддагийн. Эхчүүддээ баярлаж талархсанаа чин сэтгэлээсээ хэлнэ. Үүний хариуд эх хүн бас ийм хүндтэй үүрэгтэй гэдгээ ухамсарлана, улам хичээнэ. Ирээдүйд ээжүүд болох охидууд ч энэ баяр даган дуурайллыг дагуулна. Ээж шигээ л ийм хүн болнодоо гэх...,
Тэрэн шиг тэмтрээд үзэхэд тэр доороо юмтай хүмүүст ч гэсэн 3 сарын 18 бол эр хүншүү гэх итгэлийг олж авах, ааваасаа, ахаасаа, өвөөгөөсөө, өвөг дээдсээсээ, алга дарам газрынх нь төлөө амиа зольсон эр цэргүүдээсээ үлгэрлэх, эр хүн байхын үндэс суурийн зах зухаас олж мэдрэх ОНЦ ач холбогдолтой баяр байх учиртай. Гэтэл нэг муу унжуургатай төрцөндөө эрдэж ууж идэх маань ихдээд байдаг тал бийшүү. Энхийн энэ цагт хүн бүр хил манаж, хэн нэгнээс газар шороогоо өмөөрөн дайтах шаардлага гарах ч үгүй.
Харин эр хүн шиг эр хүн байж гэр орноо айлын дайтай авч явах, алсын бодолдоо 3 сая хүн амаа аль нэг улсад уусган шингээчихгүйн тулд өөрөөсөө өмөрч тасарсан үр хүүхдэдээ үндэсний соёл, өвөг дээдсийн генээ хадгалж явах хатуу захиасыг ухаанд нь уяж өгч чадвал л эр хүн хэмээн өөрийгөө тооцож энэ баярыг тэмдэглэвэл зохилтой.
Японы Самурайн түүх бол бидний эрт галавын эцэг өвгөдийн түүхтэй харьцуулахад их ямххан соёл, ядмагхан түүх. Гэвч өнөөдрийг хүртэл эр хүний бахархал болгон өвлүүлэн үлдээж чадсан нь хариуцсан ажлаа цалгардуулбал амиа эр хүний ёсоор бүрэлгэдэг хатуу ч гэмээр үйлээс нь харагддаг. Энэ дэг жаяг, ёс уламжлал, өвөг дээдсийнхээ захиасыг өв уламжлуулах үндэсний бодлого л манайд дутаад байнашүүдээ. Эцэг нь хүүгийнхээ ухаанд нь багаас нь захиас хийж, их задраад байвал ширүүн үг, ширэн бүсний амтыг хааяа мэдрүүлдэг байх нь тэр гэр бүлийн хүчирхийлэл, хүний эрхээс тэс ондоо юм.
3 сарын 18 эрчүүдийн баяр байх учиртай. Үүргээ ухамсарлах, үнэт зүйлээ эрхэмлэх жилдээ тохиох ганц өдөр... Бүстэй төрсөн хүүхэддээ бүтэн нэрээ өргөж явахын учрыг, эр хүн хэмээхийн мөн чанарыг, эцэг өвгөдийн бахархам түүхийг энэ өдөр дахин нэг сануулаарай. Эрчүүдийн баярын мэнд хүргэе!!!
Эх сурвалж: www.grandnews.mn
Сэтгэгдэл (5)