Хоёрдугаар сарын 08 буюу өчигдөр 14 цагийн үед Баянзүрх дүүргийн 26 дугаар хороо “Саруул Хотхон”-ы барилгын есөн давхраас 36 настай иргэн Б унаж, нас барсан хэрэг гарлаа. Талийгаач Б нь тус барилгад ажиллаж байсан бөгөөд есөн давхраас тоосго буулгахаар лифтний хонгилд ажиллаж байх үедээ ийнхүү амиа алджээ. Тодруулбал, лифтний ган татлага тасарснаар есөн давхраас унаж амиа алдсан аж.
Тус барилгын захиалагчаар “Саруул Хотхон” ХХК, гүйцэтгэгчээр “Алтай Констракшн” ХХК ажиллаж байжээ. Одоогоор “Алтай Констракшн” ХХК-ийн үйл ажиллагааг түр зогсоогоод байгаа юм байна.“Саруул Хотхон” цогцолборын барилгын эхний ээлжүүд 2014 онд ашиглалтанд орно гэж захиалагчидаасаа мөнгийг нь авчихаад өнөөдрийг хүртэл ашиглалтанд ороогүй байгаа барилга. Захиалагчид нь шүүх цагдаагаар явахдаа тулан хэл ам татлаад байгаа энэ барилгаас ийнхүү нэгэн гэмгүй ажилчин унаж нас барлаа.
Манай сайтаар өмнө мэдээлж байснаас үзвэл Монголд хамгийн үнэтэй хөөрөг барьдаг “Алтай Констракшн”-ны Х.Бат-Эрдэнэ, түүний ээж Т.Цэрмаа гэж өөрийгөө алтаар өвч бүрсэн хатагтай байх. Өчнөөн захиалагчидынхаа мөнгийг нь авчихаад цаг тухайд нь барилгаа ашиглалтанд оруулсан байсансан бол гэмгүй нэгэн ингэж амиа алдаа ч уу үгүй ч үү.
Алтан шаахай өмсөвч алцан майга нь арилахгүй гэдэгчлэн алт мөнгөө өөрсдийгөө өвч бүрж байхаар нас барсан ажилтаныхаа хойдын буянг нэг төртэйхэн гүйцэтгэчихээсэй билээ. Ум ма ни бад ми хум.
Эх сурвалж: Grandnews.mn
Сэтгэгдэл (3)