Хамартынхан

Косметик мэс засалд нэг айхтар маапаан байдаг. Нэг эмчийн гараар орсон хүмүүс эгээтэй л эгч дүүс мэт, ихрүүд аятай адилхан болоод эзнээ бариад өгчихдөг гэмтэй. Ямартай л солонгос сериалын сайхан бүсгүйчүүд нэг хэвэнд цутгачихсан юм шиг өөр хоорондоо ижил төстэй байхав дээ. Манайд бол Н.Оюуны охид гэх нэр томъёо хүртэл бий болж орхисон. Нээрээ анзаарах нь эгч дүүс шиг бүсгүйчүүд энд тэндгүй явж байна шүү. Энэ удаад хамрын ихрүүдийг онцолъё.

Намхан нуруутай, навтгар хамартай монголчуудын түгээмэл хийлгэдэг мэс засал нь хамар өндөрлөх. Уг нь хамрыг дурлалын эрхтэн гэх. Чухам дурлалын эрхтнээсээ болоод нэг хэвэнд цутгасан юм шиг адилхан том том, өндөр өндөр хамартай болоод байгаа бүсгүйчүүдийн төлөөлөл болсон Г.Хонгорзул, Ч.Уранбилэг, жүжигчин Г.Отгонцэцэг нар хоорондоо тун чиг адилхан харагдаж байх чинь ээ.

Мэс заслын донтон, жүжигчин Г.Отгонцэцэг хамраараа тоглож ханадаггүй нэгэн. Жилийн жилд дурлалын эрхтнээ яаж ч өөрчлөөд сэтгэл ханаж байгаагүй Г.Отгонцэцэг дахиад л хамраа өөрчилсөн харагдана. Эцэс сүүлдээ фэнүүд нь танихаа байхвий дээ.

Бас нэг ээлжит донтон дуучин Ану бүр танигдахаа болоод байна. Төрж, тэлсэн биш улам өнгө зүс нэмээд буй тэрээр төрсөн дүүгээ хүртэл мэс засалд донтуулаад авсан гэж байгаа. Ялангуяа хамрыг яаж өөрчилж болдгийг яруу тодоор харуулж буй дуучин дүүтэйгээ нэг хэвтэй хамартай болсон нь илт анзаарагдаж байгаа биз.

Ингэхэд Ану маань хамгийн сүүлд өгзөгөө хүртэл өөрчлөөд амжсан гэсэн. Алиман хэлбэрийн өгзөг ч угаас охид хүүхнүүдийн өнө мөнхийн мөрөөдөл л дөө.

Нуухыг нь авах гээд нүдийг нь сохлов гэдэг үг мисс Г.Хонгорзулд тохирсон гэлтэй. Угаас анзаарах нь ээ, дурлалын эрхтнээрээ нэлээн хэд янзалж байж төгс төрхөндөө ордог эд үү дээ. Яагаад дуучин Ж.Алтанцэцэг гэхэд л яалаа. Г.Хонгорзулын тухайд гэхэд л туршлага дутагдсан нь илт анзаарагдаж байгаа болохоор мэс заслын хатан хаануудаас зөвлөгөө авахыг зөвлөмөөр юм уу даа.

Загварын тайзнаа бараагаа харуулахаа байсан топ модель Ч.Уранбилэг нэлээд намба сууж, овор нэмснээр энэ жилийн “Гоёл”-ын тайзнаа гарч ирсэн юм. Олон дахин мэс заслын ширээнээ заларч төрөл арилжсан биш танигдахаа больсон энэ бүсгүй мөн л хамраараа дураараа тоглож дунд чөмгөөрөө жиргэж яваа нэгэн.

Магад Ч.Уранбилэгийн тухайд оновчтой шийдэл болсон гэж болохоор. Нэг л өөр харагдаад байсны нууц нь энэ гэж байгаа. Өндөр хамартай болсон биш намба сууж, том хамартай болсон биш овортой болсон гэдгээ Ч.Уранбилэг мэддэг болов уу, яадаг бол хэмээн хэл амтай зарим нь шивэр авирхийж байна лээ, цаана чинь.

 

Эх сурвалж: Grandnews.mn

М.Сонор