Монголын Оюутны Холбооны ерөнхийлөгч Д.Батбаяр хэсэг оюутнуудын хамтаар мэдээлэл хийлээ. Тэд бүх оюутанд биш харин тодорхой шалгууруудыг хангасан оюутанд урамшууллын тэтгэлэг 70 мянган төгрөг олгох ёстой гэлээ. Улс орны эдийн засаг хүнд байхад жилд дунджаар 100 гаруй тэрбум төгрөгийг үндэсний болон урамшууллын тэтгэлэг гээд оюутнуудад өгөх нь өнөөгийн нөхцөл байдалд тохирохгүй байна гэж тэд үзжээ.
Сүүлийн гурван жилд 300 гаруй тэрбум төгрөгийн тэтгэлгийг олгосон бөгөөд 2014-2015 оны байдлаар нийт 12 1224 оюутанд 91,3 тэрбум төгрөгийн үндэсний болон урамшууллын тэтгэлэг олгохоор тооцсон байна.
Тиймээс МОХ-ны зүгээс оюутан залуучуудын санал санаачлагаар дараах санал, шийдвэрийг хүргүүлж байгаа юм байна.
Оюутан залуусын сурлагын голчийг 2.0 үнэлгээгээр тооцон олгож байсан бол үүнийг өөрчлөн 3.0 голч онооноос дээш үнэлгээтэй суралцаж буй оюутанд олгох хэрэгтэй гэжээ. Ингэснээр нийт 62 780 оюутанд 48,8 тэрбум төгрөг олгогдох ба 32 тэрбум төгрөгийг хэмнэх боломжтой. Мөн магистр болон докторын шатлалын сургалтанд суралцаж буй оюутнуудад үндэсний тэтгэлгийг олгохгүй байснаар 4,8 тэрбум төгрөгийг хэмнэнэ.
Үндэсний болон урамшууллын тэтгэлгийг олгохдоо голч үнэлгээнээс гадна амьжиргааны төвшин, хагас болон бүтэн өнчин байдал, хөгжлийн бэрхшээлтэй оюутан, орон нутагт суралцагчид, нийгмийн идэвх оролцоо буюу олон нийтийн үйл ажиллагаанд оролцсон байдал зэргийг харгалзан олгохоор журманд өөрчлөлт оруулах юм байна.
Тэтгэлгээс хэмнэсэн мөнгөний тодорхой хувиар оюутанд чиглэсэн бүтээн байгуулалт хийх, нийтийн номын сан, оюутны дотуур байр барих, сургалтын баазыг бий болгох, дэлхийн тэргүүлэх чиглэлийн сургуулиудаас эрдэмтэн багш нарыг ажиллуулах зэрэг саналуудыг хүргүүллээ.
Тэгэхээр сар болгоны 70-аа хүлээдэг, авахыг хүсдэг оюутнууд сурлагын үнэлгээний голчоо 3.0 хүргэхийн тулд хичээлдээ илүү шамдах хэрэгтэй болж байна.
Б.Цэцэг
Сэтгэгдэл (2)