“Монголбанк”-ны гэх тодотголтой ноён О.Чулуунбат шинэ Засгийн газарт Ерөнхий сайдын зөвлөх хийж эхлээд буй. Бас болоогүй МАН-аас гарч МАХН-ыг сонгосон сонголтондоо эргэлзэн АН-д “хүргэн” орох гэж яваа талаар нь дуулдаж байгаа. Тэгвэл О.Чулуунбат ноёнтны хүү Ч.Бүрдэнбат гэж асуудал шуугиан дэгдээж явдаг, аавынхаа чихийг халууцуулж дуусдаггүй нэг залуу байх юм. Орчин үеийн мисс, боссуудыг нэг дээвэр дор цуглуулж "Даймонд" гэхчлэн дээдсийн тансаг зэрэглэлийн шоу сэлтийг зохион байгуулж явдаг тэрбээр нэлээн хэдэн жилийн өмнө хар тамхины хэрэгт холбогдож, молекул Батж.Батбаярын хүүтэй цуг "аав"-ын хаалга татаж байсан ч сайн эцгийн сүр хүчээр ял, шийтгэлээс мултарч байсан удаатай. Тэр хэрэг төвөгт орооцолдсоны дараахан хэл амнаас дайжиж, хэсэг хугацаанд Тайваньд амьдарч байсан.
Гээд яахав. Очгэрэл хэмээх сайхан гэргийтэй болж хөөрхөн хүүхдүүдийн аав болсон Ч.Бүрдэнбат сүүлийн жилүүдэд монголдоо суурин байгаа. Үе үехэн хэрэг тарьчихаад явж байдаг тэрбээр нэлээд сүрхий гээчийн асуудалд холбогдсон гэх мэдээлэл байна. Юу гэхээр Ч.Бүрдэнбатад холбогдох хэргийг Улсын Дээд шүүх саяхан хэлэлцсэн байна. Чухам яагаад тэр шүүхийн хаалга татах болсныг нь тодруулбал, Ч.Бүрдэнбат нь 2014 оны 4 дүгээр сарын 12-ны орой Хан-Уул дүүргийн 2 дугаар хорооны нутаг дэвсгэрт байрлах “Центро” бааранд хүүхэн шуухантай холбоотой асуудлын улмаас танхайрсан аж. Тухайн үед тэрбээр тус бааранд байсан О гэгч эмэгтэйд хүч хэрэглэн танхайрч, зүүн нүдийг нь тэс цохьсон байна. Түүнд цохиулж зодуулсан О-гийн тархи доргиж, зүүн нүдний ухархайн дотор ханын хугарал, алимны ойролцоох эдэд хий хуралт, зүүн нүдний дээд, доод зовхи, хацрын төвгөрийн зөөлөн эдийн няцрал, цус хуралт бүхий хөнгөн гэмтэл учирсан гэх шүүх эмнэлгийн дүгнэлт гарчээ.
Түүнчлэн О бүсгүй БНСУ руу явж, нүдэндээ хиймэл эд суулгуулсан гэх мэдээлэл байгаа юм. Ч.Бүрдэнбатад холбогдох энэ хэргийг Дүүргийн эрүүгийн хэргийн анхан шатны 2 дугаар шүүх өнгөрсөн 9 дүгээр сард хянан хэлэлцээд Ч.Бүрдэнбатыг танхайрсан хэмээн үзэж, 3 жил 2 сар хорих ялаар шийтгэж, Эрүүгийн хуулийн ерөнхий ангийн 61 дүгээр зүйлийн 61.1 дэх хэсэгт заасны дагуу хорих ялыг 1 жилийн хугацаагаар тэнсэж хянан харгалзсан байна.
Эрүүгийн хуулийн 61 дүгээр зүйлийн 61.1-д “Хүндэвтэр гэмт хэрэгт анх удаа хорих ял шийтгүүлсэн этгээдийн үйлдсэн гэмт хэргийн нийгмийн аюулын шинж чанар, хэр хэмжээ, гэмт хэрэг үйлдсэн этгээдийн хувийн байдал, гэмт хэрэг үйлдсэн нөхцөл байдлыг харгалзан гэмт хэргийн улмаас учирсан хохирлыг нөхөн төлсөн буюу гэм хорыг арилгасан тохиолдолд түүнд оногдуулсан ялыг биечлэн эдлүүлэх шаардлагагүй гэж шүүх үзвэл уг ялыг тэнсэж, нэгээс таван жилийн хугацаагаар хянан харгалзахаар тогтоож болно.” гэж заасан байдаг тул ийн тэнсжээ.
Ер нь бол Ч.Бүрдэнбатыг хохирогч О-гийн мөрдөн байцаалтын шатанд гаргасан нэхэмжлэл буюу хохирлыг маргахгүйгээр төлснийг харгалзан үзэж Анхан шатны шүүх ялыг нь тэнссэн гээд байгаа. Гэтэл хохирогч О-гийн тухайд эмчилгээний зардлаа бүрэн авч чадаагүй гэж байгаа аж. Юу гэхээр тэрбээр шүүх хуралдааны үеэр БНСУ-д хийлгэсэн эмчилгээнийхээ зардлыг баримтаар гарган нэмж нэхэмжилтэл анхан шатны шүүх түүний тэрхүү нэхэмжлэл нь хохирогчид учирсан гэмтлийг эмчлэхэд гарсан зардлыг нотлож байна гэж үзэх үндэслэлгүй гэж үзээд орхичихжээ. Давж заалдах шатны шүүх мөн анхан шатны шүүхийн дүгнэлтийг хүлээн зөвшөөрсөн байгаа юм.
Тэгвэл Улсын Дээд шүүх энэ хэргийг хэлэлцээд хоёр шатны шүүхийн шийдвэрүүдийг хүчингүй болгожээ. О бүсгүйн тухайд Ч.Бүрдэнбатад зодуулснаас үүссэн хохирлоо барагдуулаагүй байхад хоёр шатны шүүх хохирлыг нөхөн төлсөн гэж үзэж байгаад гомдолтой байгаагаа илэрхийлсэн юм байна. Тэрбээр анхан шатны шүүх хурлын дараа үлдсэн төлбөрөө гаргуулах гэж Ч.Бүрдэнбаттай холбогдох гээд чадаагүй гэнэ. Ч.Бүрдэнбат хүний нүдийг тэс цохьчихоод хэдэн төгрөгөөр хохирол барагдуулах болохоор зугтаасан гэж үзэж байгаа аж.
Ямартай ч Улсын дээд шүүх Ч.Бүрдэнбатад холбогдох хэргийг нягталж үзээд хохирогч О гэмт хэргийн улмаас учирсан хохиролтой холбогдуулан шүүх хуралдаан дээр нэмж нэхэмжлэл гаргасаар атал уг нэхэмжлэлийг хэрэгсэхгүй болгосон, эсхүл хэлэлцэхгүй орхисон алин болохыг тодорхойлон зааж, үндэслэлээ бичилгүйгээр Ч.Бүрдэнбатыг О-д төлөх төлбөргүй гэж үзэж, хорих ялыг тэнссэн нь буруу байна гэсэн дүгнэлтийг гаргасан байна. Тэгэхээр Ч.Бүрдэнбатын тухайд хоёр шатны шүүхээр толгой илүүлсэн бол дээд шүүхээр ороод гарахдаа ийнхүү хариуцлага хүлээх ёстой гэсэн том сургамжийг авлаа.
Эхэнд өгүүлсэнчлэн, хар тамхи, казино гэхчлэн олон асуудалд холбогдож ирсэн тэрбээр бүхэл бүтэн хүний эд эрхтэнийг гэмтээчихээд, үл тоож байгаагийн цаана аавынх нь нөмөр нөөлөг том байж ирсний “уршиг” ч мөн байгаа л биз. Ямартаа л О.Чулуунбат эрхэм хүүгээ хар тамхины хэрэгт холбогдсоны дараа "Миний хүү хүн буудаж, хулгай хийсэн биш би үүнд эмзэглэдэггүй. Хар тамхи гэдэг чинь янз бүрийн хэлбэрээр байдаг. Америк болон бусад оронд хэрэглэхийг зөвшөөрдөг хар тамхины хэлбэрийн юмнууд байдаг. Бидний үеийнхэн архи уухаараа чөлөөтэй болоод дуулж бүжиглэдэг шүү дээ. Юу гэх юм бэ дээ, их бага хэмжээгээр мансуурч байгаа юм уу даа. Бидний үеийн энэ хорт зуршил муу бөгөөд хоцрогдсон. Элэг, тархи гээд бүх эрхтэнд хортой. Би Америкт байсан. Тэнд залуучууд бааранд орохдоо нэг таблетик залгичихаад л ордог. Тэгээд сайхан бүжиглэж байгаад гараад явчихдаг. Маргааш өглөө нь толгой нь ч өвдөхгүй, шартана ч гэж байхгүй. Манай хуулинд хар тамхи гэхээр бүгдийг нь гэмт хэрэгтнээр дүрсэлчихсэн. Өнөөдөр соёлтой Англи, Голандад баарнуудад хар тамхийг зөвшөөрдөг. Манай хүү Америкт 6 жил сурсан. Яг Америкийн соёл, оюутан залуусынх нь амьдралаар амьдарч байгаад ирсэн. Би хүүтэйгээ ярьж үзсэн л дээ. Хүү маань надад "Та нар найз нөхөдтэйгээ наргиж цэнгэхдээ архи уугаад маргааш нь шартаад, толгой нь өвдөөд эцэстээ бүгдээрээ элэгний церрозтой болчихдог. Баруунд ийм шинэ технологи гараад жижигхэн таблетик гарчихсан. Энийг залгиад л маргааш нь эв эрүүл, ямар ч хүндрэл байхгүй ажлаа хийгээд явчихдаг шүү дээ" гэсэн" хэмээн ярьж байсан хүн л дээ.
Тэгэхээр хүүдээ ийм маягаар хир халдаадаггүй О.Чулуунбат ноёнтон бүсгүй хүний нүдийг тэс цохьсон хүүдээ хатуу үг хэлээ болов уу, яагаа бол...
Б.Сар
Сэтгэгдэл (53)