“Хар тамхины хэргийн толгойлогч” гэх Б.Халиун, Б.Хулан нэртэй эгч дүүс Монголд төдийгүй гадаадад зард гараад багагүй хугацаа өнгөрч байна. Тэд 2007 оноос эхлэн улс орон дамжиж хар тамхи зөөвөрлөх гэмт хэрэг үйлддэг болсон гэдэг. Мөн тэд бусдыг энэ төрлийн гэмт хэрэгт уруу татан оролцуулдаг байсан нь удаа дараагийн үйлдлээр нотлогдсон байдаг.
Хэвлэл мэдээллийн хэрэгслээр тэднийг Малайз улсын хууль хяналтынханд саатуулагдан баригдсан гэх мэдээлэл тархаж байсан. Б.Халиун нь баригдах үедээ 75 кг буюу нэг шуудай хар тамхи зөөвөрлөж явсан гэдэг. Гэвч баригдсан гэх Б.Халиунд ямар хэмжээний ял оногдуулсан тухай тодорхой мэдээлэл байхгүй байсаар байна. Ямартаа ч Малайзын шоронд хоригдож байгаа бөгөөд манай улсын хуулийнхан нааш авч ирэхээр хөөцөлдөж байгаа гэх албан бус мэдээлэл хүртэл байгаа юм. Түүнчлэн тэднийг чухам яагаад барьж чаддаггүй байсан тухайд олон таамаг байдаг. Хууль хяналтынхантай ч холбоо сүлбээтэй байж болзошгүй гэх таамаг гарч байсан билээ.
Ямартай ч тэднийг 2007 оноос эрэн сурвалжилж интерполоор хүртэл хайж байсан гэхэд “зартай” гэхээс аргагүй. Мөн тэднийг Зүүн өмнөд Азийн улс орноос Хятадын зах зээлд хар тамхи нийлүүлдэг Африкийн “Алтан гурвалжин” гэмт бүлэглэлийн гишүүнээр элсэн ажилладаг байсан гэгддэг юм.
Хууран мэхэлж хар тамхины бизнесээ эрхэлдэг
Тэд бусдыг хууран мэхлэх замаар хар тамхи зөөвөрлүүлдэг байсан аж. Тэр хоёрын даалгасан ажлыг мөнгөний төлөө учир мэдэхгүй хийж байгаад баригдсан тохиолдол их байгаа юм. Эсвэл ихээхэн хэмжээний мөнгө амалсны төлөө амиараа дэнчин тавьж тэдний даалгасан ажлыг гүйцэтгэдэг. Үүнд тодорхой эрхэлсэн ажил хөдөлмөргүй, мөнгөний төлөө юу ч хийхээс буцахгүй хүмүүсээр, эсвэл оюутнуудаар гар хөлөө хийдэг.
Б.Хулан, Б.Халиун нар Монголынхоо 30 гаруй иргэнээр 2007 оноос хойш хар тамхи тээвэрлүүлж эхэлсэн байна. Дээрх эгч дүүс Монголоос уруу татаж /хуурч/ авчирсан иргэдээр Балба, Малайз зэрэг улсаас капсултай хар тамхи тээвэрлүүлж улмаар Шинжаан, Гуанжоу руу оруулдаг байсан бөгөөд 30 гаруй хүн Монголд эрүүгийн хэрэгт татагдчихсан, шалгагдаж байв.
Тэдний “урилгаар” урд хөршид очсон Монголын олон иргэн Хятадын шоронд ял эдэлж байгаа юм. Мөн амиа алдсан нэгэн нь ч байдаг байна.
Хар тамхины толгойлогчдын хөлд үрэгдэгсэд
Жишээ 1: Б.Халиун нь хар тамхи зөөвөрлөхдөө Малайзад сурдаг монгол хоёр оюутныг хууран мэхлэх замаар, хялбар аргаар их мөнгөтэй болно хэмээн худал хэлж, оюутны байранд нь хар тамхи хадгалуулж байгаад цагдаад баригдсан юм. Тэдгээр оюутнууд Б.Халиуны золиос болсон бөгөөд гурван удаа шүүх хурлаар орж “Бид хэрэг хийгээгүй, хар тамхи зөөж, нуугаагүй” хэмээн мэдүүлснээр хэргийг нэмэлт мөрдөн байцаалтад буцаасан байдаг.
Жишээ 2: Хятад улсад хар тамхины хэргээр насаараа хоригдох ял сонсч, өнгөрсөн жил ялыг нь хөнгөрүүлж 25 жилийн хорих ялаар өөрчилсөн Л.Байгалмааг бусдын уруу таталт, худал мэхэнд орж хүний нутагт ял авсан гэдэг ч, их мөнгө олохын тулд баригдахаасаа өмнө хоёр ч удаа хар тамхи нууцаар тээвэрлэсэн гэдгийг албаныхан хэлдэг юм билээ. Ар гэр, олон хүүхдээ тэжээхийн тулд хар тамхины толгойлогч болж, өдгөө аль улс оронд байгаа нь мэдэгдэхгүй, нутаг нэгтнүүдийнхээ амьдралаар тоглосон эгч, дүү хоёр болох Б.Хулан, Б.Халиун хоёрын урхинд орж урагшаа явсан гэж ярьдаг.
Жишээ 3: Б.Халиун, Б.Хулан нар төрсөн дүү болох Б.Билгүүнийгээ өөрсдийн хар тамхи зөөвөрлөх үйл ажиллагаандаа татан оролцуулснаар дүү нь эхнэр С.Оюунзаяагийн хамт хар тамхи зөөж байгаад Казакстан улсад баригдсан байдаг. Гэр бүлийн хоёр Казакстан улсад 2007 онд 17-19 жилийн ял сонссон. Харин Улсын ерөнхий прокурор асан Д.Дорлигжавын тэдний үлдсэн ялыг Монгол улсад эдлүүлэх гэрээнд гарын үсэг зурж эх оронд нь авч ирсэн байгаа юм.
Жишээ 4: Эгч дүүсийн хар тамхины наймаанд хятад иргэд ч цөөнгүй үйлдчилдэг байна. Тэднээс шүүхийн хаалга татаж, ял сонссон хятад иргэд хүртэл байдаг байна.
Тэд Зүүн Өмнөд Азийн “Алтан гурвалжин” хар тамхины бүлэглэлтэй нийлж элэг нэгт нутгийнхаа 17 иргэнийг Хятадад хар тамхины хэргээр торны цаана суулгасан гэх мэдээлэл гарч байсан. Мөн Нигерийн гэмт бүлэглэлтэй холбоотой болж, Монголын 40 гаруй хүнийг хар тамхины гэмт хэргийн золиос болгосон байдаг.
Эцэст нь «Алтан гурвалжин» бүлгийнхнээс зугтан эх орондоо ирэх гэсэн хүмүүс амь гарч, зугтаад ирлээ гэхэд тэдэнд хар тамхи зөөвөрлөсөн, зохион байгуулалттай гэх зэргээр Эрүүгийн хуулийн хэд, хэдэн зүйл анги уншихаас аргагүй болдог байна.
Харийхны хүүхэд төрүүлсэн гэх эгч дүү
2011 оны дөрөвдүгээр сарын 13-нд Хонгконгд Б.Хулан Бенжамин гэдэг хүүхдээ төрүүлж байжээ. Түүнчлэн Б.Хулан Хятадад хар тамхины хэргээр цаазын ял сонссон Х.Дамдин гэгчийн эхнэр юм.
Гэвч тэрбээр Африкийн хар тамхины мафийн толгойлогчийн хүүтэй хайр сэтгэлийн холбоотой болж, хүүхдийг нь төрүүлсэн гэдэг. Б.Халиуны тухайд ч гэсэн өнгөт арьстны хүүхдийг төрүүлсэн гэх мэдээлэл байдаг.
П.Зулаа
Сэтгэгдэл (22)