Жолооны курс шинэ тутам ойлголт байсан 1999 онд үүсгэн байгуулагдсан “Номгон санчир” ХХК-ийн захирал хатагтай А.Адьяасүрэн тэр бүр олны хөлийн газар харагддаггүй ч хотын дөрвөн дугуйт хөдөлгөдөг бүхэн таньдаг. Монголын мэргэшсэн жолооч бэлтгэх зах зээлийн 90 хувийг эднийх дангаараа эзэлдэг тул танихаас ч аргагүй. Авто сургуулийн захирал гэхээр ширүүн дориун, “масс”-тай хатагтай байх юм байх гэтэл ийм турьхан бүсгүй байдагт олон хүн хачирхдаг гэсэн. Ямартаа л жолооны шалгалт дээр залуус “Чи тэнцсэн үү, тэнцсэн үү, хуулуулчих” гэж захирлыг танихгүй шалж байх вэ дээ.
Авто замын хатан хаан маань сэтгэл судлаач, түүхч мэргэжилтэй. 21 насандаа УБИС-д магистр хамгаалж мэргэжлээрээ багшлан Монголын хамгийн залуу доктор болох ирээдүйтэй хэмээн үнэлэгдэж байсан боловч эрдмийн ажлаа орхин энэ салбарт хөл тавьжээ. Түүний нөхөр Ц.Амарсанаа ШУТИС-ийн МИС-д багшилдаг. Хосууд хоёр хүүхэдтэй том нь Кембрижийн “Шинэ-Эрин”, бага нь “Орчлон”-д сурдаг. Хөдөө орон нутагт 13 салбартай тус компани Өмнөговь аймгийн Цогтцэций суманд 2 давхар 200 метр квадрат жолооны курс нээсэн нь орон нутаг дахь анхны тохиолдол юм билээ. Монголд авто сургуультай холбоотой анхдагч бүхэн эднийхтэй холбогддог.
VIP сургалт нь олны таашаалд ихэд нийцэж байгаа бөгөөд өнгө үзэмж төгс “Соната 7” дээр тус сургалтанд хамрагдагсад суралцдаг нь хэдийнэ брэнд үйлчилгээ болжээ. Ийм нэгэн хөдөлмөрч, дэгжин хатагтай их хотын хөл хөдөлгөөн дунд бидний дуранд өртсөн юм.
Б.Уян
Сэтгэгдэл (7)