Тэд халтуураас өөр орлогогүй юу?
Баяр дөхөөд ирэхээр дуучдын ажил эхэлдэг. Шуудхан хэлэхэд халтуур хийх ид цаг нь. Монголын алдартай одод гэх алтан пайзтангуудын тухайд өндөр үнэ ханш тогтоосон байдаг нь нууц биш.
Юмны үнэ өсөхийн хэрээр дуучдын хоолойны үнэ бас өсдөг хэмээн хошигноход буруудах газаргүй. Тодорхой орлогогүй ч, хаа нэг тоглолт хийхээс илүү аль нэг газар уригдаж, ам барьж зогсоод санхүүждэг гэх ойлголт олон нийтэд төрөх болж.
Халтуурны ханш жилээс жилд...
Шинэ он гарах дөхсөн эдгээр өдрүүдэд байгууллага хамт олны шинэ жилийн цэнгүүн тасралтгүй зохион байгуулагдаж байна. Албан байгууллагууд баярын үйл ажиллагаан дээрээ хамтлаг дуучдыг урин авчирч баяр дээрээ баяр нэмдэг. Харин урлаг соёлынхон маань жил бүр өөр өөрийн гэсэн үнэ ханшаар уран бүтээлээ хүргэхээ мэдэгддэг юм.
Жилээс жилд дуулах үнэ өссөнийг харахад чанар, дуучдын хоолойг сайжирсан гэж дүгнэх үү. Нөгөө л дууг, нөгөө л хоолойгоороо дуулдаг байлтай. Үнэндээ зарим нь ам барина. Наашлаад онигоонд орно. Цаашлаад шинэ жилийн баярыг гутааж, уур амьсгалыг эвдэнэ гэж байгаа. Хамгийн сүүлийн байдлаар гэхэд Б.Амархүү, "3 охин" хамтлаг тийм онигоонд ороод байна.
Шинэ ханшаар бол...
Яг үнэндээ албан байгууллага, хувийн компани дуучдын хэлсэн үнийн дагуу өгдөг болохоор халтуурны үнийг хөөргөж байгаа гэж үздэг тал байна.
Энэ жилийн хувьд хамтлаг дуучдын үнэ ханш ямар байгааг жагсаалтаар сонирхуулахад. 1. "Камертон" хамтлагийн ахлагч, Төрийн соёрхолт, дуучин Д.Болд хамгийн үнэтэй үнээр буюу 5.5 сая төгрөгөөр
2.Поп хатагтай МУГЖ Б.Сарантуяа 2-3 дууг 4 сая төгрөгөөр
3."Чинги"с хаан хамтлагийн ахлагч МУГЖ Д.Жаргалсайхан 3.5-4 саяар
4.МУГЖ Т.Ариунаа, С.Наран нар 2.5-3 сая төгрөгөөр
5.С.Сэрчмаа 2 сая төгрөгөөр хэдэн ч дуу дуулахад бэлэн
6.BX 500 мянган төгрөгөөр дуулж байгаа юм байна.
Харин хамтлагуудын хувьд
1."Хурд" хамтлаг хамгийн өндөр ханшаар буюу 4 саяар
2. "3 охин", "Киви" хамтлагууд 2.5-3 сая төгрөгөөр
3. "Anemone" хамтлагийнхан 1.2-1.5 саяар дуулах аж.
Тэгвэл нийтийн дуучдын хувьд 800 мянгаас 3 сая төгрөг гэсэн ханштай байгаа гэнэ.
Гэтэл Ардын жүжигчин Б.Зангад "Сүлд модны наадам" дуугаа 300 мянгаар дуулна хэмээсэн нь энэ жилийн хамгийн доод ханш ажээ.
Хоолойгоороо юу?, гавьяагаараа юу?
"Камертон" хамтлагийн ахлагч, Төрийн соёрхолт, дуучин Д.Болдын ханш “төрийн соёрхолт” гуншинтай болохоороо ийм өндөр байна уу гэдэг асуудал нийтэд эргэлзээ төрүүлж буй нь дамжиггүй.
Залуу эрч хүчтэй гэгдэхээс биш залуусын хэлдгээр тийм ч “тасарчихсан” хоолойтой дуучин бол биш гэж ярьдаг. Тэгвэл магадгүй “төрийн соёрхолт” гэдэг том үгтэй холбоотой болж таарах уу? Урлагт насаараа зүтгэсэн Ардын жүжигчин Б.Зангад зүгээр л “ардын жүжигчин” болохоороо даруу загнаж байгаа хэрэг үү?
Ямартай ч хийсэн бүтээсэн, урлагт удаан амьдарсан амьсгалснаараа үнэлэгддэггүй нь эндээс харагдана.
“Халтуур хийхгүй” дуучин
Саяхан “Монгол өлсөх учиргүй” тоглолтоо хийсэн МУГЖ С.Жавхлан орлогоо эмзэг бүлгийн хүмүүст зориулсан. Тэрбээр шинэ жилийн ямар нэгэн арга хэмжээнд оролцон “халтуур” хийхгүй гэдгээ албан ёсоор мэдэгдсэн билээ. Энэ тухайгаа “Эдийн засгийн хямрал ихтэй үед сая саяар нь мөнгө үрж байхаар хоол хүнсгүй иргэдэд энэ мөнгөө зарцуулья” хэмээн уриалсан юм.
Сая саяар нь дуучин хөлслөх нэг нь байхад, өдрийн хоолгүй хонодог нь тэрнээс ч олон байгаа гэдгийг тэр олон хүнд сануулахыг хүссэн буй за.
Шүүмжлэл дагуулсан “одонцорууд” Бу.Жагаад...
Ямартай ч Бу.Жагаа “Манай дуучид нэртэй одонцорууд ганц ам барьж дуулсныхаа төлөө надаас гурван сая нэхэж байгаа юм. Үнэхээр ам барихгүй тэр дуугаа сайхан дуулах юм бол би хүссэн мөнгийг нь өгч чадна ш дээ” хэмээн хатуухан шүүмжлэлийг хэлсэн нь үнэний ортой.
Мэдээж ганц дуучны царайг харж, хоосон панограм сонсохын тулд дор хаяж сая төгрөг төлөх чадвартай хүмүүс манайд хэр олон байдаг бол. Бодож үзэх л хэрэгтэй асуудал. Үгүй тэгвэл, панограм тавьж дуу дуулах юм бол бусдын шинэ жил дээр ирээд ч хэрэггүй юм биш үү. Хоолойг нь сонсож уярч, эсвэл хөгжилдөцгөөх гэж дуучныг тайзан дээрээ урьсан гэж ойлгож суутал, ганц хоёр дууг худлаа амаа хөдөлгөж жүжиглэсэн болоод буучихна гэж хэн санахав дээ.
Амьд дуулах гэдэг үгний “амьд”-ын үнэ цэнэ чухам “үнэн хоолойнд” оршдог байлтай. Нэртэйгээр нь панограм тавьж дуулах ханш, амьд дуулах ханш гээд хоёр тусдаа болчихвол амар юм биш үү...
П.Урнаа
Сэтгэгдэл (26)