М.Наранбаатар гэж нэг хөөрхөн дуулчихдаг хүү зурагтаар гардаг байсан. Аливаа байгууллагад сагс сайн тоглодог эсвэл урлагийн авьяастай ч юмуу нуруулаг залуус дэвшихдээ амархан байдаг даа, тэр тусмаа төрийн байгууллагад. Тэрний л жишгээр энэ нүдээрээ инээсэн бумбагар цагаан залуу дарга болов оо. Харахад үгүй мөн буянтай царайтай нөхөр шүү дээ, малдийчихаад. Хүн ер нь харагдаж байгаа шигээ байдаггүй. Хоёр, гурван ч удаа улиран 9 жилийн турш МҮОНРТ-ийн захирал хийх “алтан карт”-тай болсон хүн Монголын телевизийн түүхэнд үгүй байх. Угаасаа ийм хүн доогуурх суудалд чинь заяахгүй байна. Одоогоос яг нэг жилийн өмнө юм байна, 12-р сарын 13-ны өдөр очиж очиж ихэд цээрлэдэг 13-ны өдөр байх даа ч яахав дээ. Энэ өдөр МҮОНРТ-ийн ээлжит хуралдаанаар МҮОНТ-ийн шинэ захирлаар УИХ-ын Хэвлэл мэдээлэл олон нийттэй харилцах хэлтсийн дарга Д.Энхтуяа, МҮОНРТ-ийн захирлаар Ерөнхийлөгчийн Тамгын газрын Олон нийттэй харилцах, хэвлэл мэдээлэл боловсруулах албаны дарга Ё.Батбаяр нар тус тус томилогджээ.
Харин өнөөдөр бол 12-р сарын 9-ний өдөр. Ядаж жилийнх нь ойнд хүргээд халдаг байгаа даа, тэр сайхан төрийн ордны ажлаа орхиод ирсэн хүмүүсийг. Тэд халагдах тушаалаа авчээ. Би зүгээр нэг л юм хэлдэг, нэг л юм захидаг. Нарийндаа би ч хэлээд байгаа юм биш, энэ бол дэлхийн жишиг стандарт юм шүү. Ямар ч халаа сэлгээг дүн өвлийн цагаар хиймээргүй л байгаа юм. Саяхан Ерөнхий сайд 1600 гаруй хүнийг хомроголон хална гэж хэлээд зэмлүүлээд үсэрсэн шүлс нь бол хатаагүй байна даг.
Энэ хоёр хүний юу нь тэр аппаратанд тэнцэхгүй байгаа юм бол? Д.Энхтуяа “Ийгл” телевизийн сэтгүүлч, “NTV” телевизийн мэдээ, шуурхай нэвтрүүлгийн албаны даргаар ажиллаж байгаад УИХ-ын Тамгын газрын Хэвлэл мэдээлэл олон нийттэй харилцах хэлтсийн даргаар томилогдсон.
Ё.Батбаяр нь АНУ-д боловсрол эзэмшиж байсан бөгөөд суралцах хугацаандаа “Америкийн өнгө” нэвтрүүлгийг бэлтгэж UBS телевизээр үзэгчдэд хүргэдэг байсан нэгэн.
Энэ янзаараа МҮОНРТ гэдэг газар хүн тогтохгүй “сүнс”-тэй л гэж ойлгоё. Яг үнэндээ сувгаа энэ телевиз дээр тааруулдаг айл одоо байдаг уу? Хааяа нэг харахаар хуучны нэвтрүүлгээ хэд давтаж л суух юм билээ. Одоо больчихооч, ажлаа хийгээч, нэвтрүүлэг нийтлэлийн бодлогоо “чулуу” болгооч. Суваг нь хүн үзэхээс ичмээр юм байхад нэг л их сандал ширээний тэмцэл өрнөсөн газар.
Ядаж захирал гэж сүржин томилгоо хийсэн бол нэг жилээс урт хугацаатай томилоход яана даа. Бүтэн жил тэжээгээд авсан ч юм үгүй, хаясан ч юм үгүй хүмүүсийг зүгээр явуулчихдаг юм бол тэгж цалин мөнгө гарздаж яана вэ таминь ээ. МҮОНРТ гэж үнэхээр нэг завхарсан дампуу газар байна аа.
Д.Сэргэлэн
Сэтгэгдэл (7)