“Шинэ үе” продакшны жүжигчин Ц.Алдармаад Эрүүгийн хуулийн 96 дугаар зүйлийн 96.2.6 буюу санаатайгаар, онц хэрцгий аргаар хүний биед хүнд гэмтэл учруулсан гэдэг зүйл ангиар 7 жил 10 хоногийн хорих ял оноосон билээ.
Тэгвэл түүний өмгөөлөгч Б.Дашдорж Ц.Алдармаад оногдуулсан зүйл ангийг хүлээн зөвшөөрөхгүй байгаа бөгөөд хэргийн бүрдэл хангагдаагүй, нэмэлт мөрдөн байцаалт хийх шаардлагатай байсан учраас хэргийг буцаах саналтайгаар оролцсон гэжээ. Энэ тухай тэрбээр “Нэмэлт мөрдөн байцаалтад буцаах байх гэсэн хүлээлттэй байлаа. Анхан шатны шүүх ийм шийдвэр гаргана гэж үнэндээ тааварлаагүй... Ц.Алдармаа ус цацсандаа өөрийгөө огт зөвтгөдөггүй. Би нэг цохиод авчихгүй яав даа гэдэг юм. Уураа барьж чадаагүйдээ харамсаад бардаггүй” гэлээ.
Мөн тэрбээр “Ц.Алдармаа шүүх хурлын өмнө “Би хүүдээ гадаад руу сургуульд явлаа гээд хэлчихвэл итгэх болов уу” гэхэд нь хэлэх ч үг олдоогүй. Телевизээр ээжийнхээ талаарх мэдээллийг сонсоод тэр хүүд ямар байгааг хэлж мэдэхгүй байна. Өглөө гараад явсан ээж нь шорон руу ачигдлаа гэдгийг телевизийн мэдээнээс хараад яаж байгааг төсөөлж чадахгүй юм... Хүү нь дэлгүүр орж чихэр аваад өг гэж шалахад нь Ц.Алдармаа нүдэндээ нулимстай инээгээд л явж байгаа харагдсан. Ээж хүү хоёрт төсөөлшгүй л нөхцөл бий болчихлоо” хэмээн ярьжээ.
П.Урнаа
Сэтгэгдэл (37)