Монгол Улсын баг тамирчид түүхэндээ анх удаагаа Азийн наадмаас 5 алт, 4 мөнгө, 12 хүрэл медаль хүртэж, медалийнхаа тоогоор 16-д жагссан билээ. Хэдийгээр жүдо бөхчүүд Азийн наадмыг тун амжилттай эхлүүлж, гурван алтан медаль хүртэж /Н.Түвшинбаяр, Д.Төмөрхүлэг, Г.Уранцэцэг/ бид эхний хэдэн өдөр Хятад, Өмнө Солонгос, Японы дараагаар дөрөвдүгээр байрт бичигдэж явсан ч аажимдаа байраа алдаж хойшилсон. Гэхдээ Азийн наадмаар манай баг тамирчид чадал чансааны хувьд үнэхээр ахиж, ямар ч төрөлд өрсөлдөж чадахаар, медальд зүтгэхээр болсноо харуулж чадлаа.
Жүдочид багаараа хүрэл медалийн төлөө барилдахын өмнөхөн Өмнөд Солонгосын нэгэн тамирчин манай багийнхны хоолонд эмэгтэй хүний хэрэглэсэн ариун цэврийн хэрэглэл хийж илт доромжилсон үйлдэл гаргасан. Үүний дараагаар буудлагын төрөлд өрсөлдсөн Ч.Нарантуяа жүдо бөхчүүдийнхээ доромжлолыг хариуг авах гэж шүдээ зуун ширүүхэн буудснаар Азийн наадмын аваргын алдрыг хүртэж чадсан.
Харин Азийн наадмын сүүлчийн өдрүүдэд боксын баг тамирчид хэд хэдэн медаль авчрах найдлага төрүүлж байлаа. Гэвч Н.Төгсцогтыг илт луйвардаж, зарим тамирчдын хөмсөг задарсны улмаас медаль авах сайхан боломжуудаа алдсан. Тэгвэл сүүлчийн өдөр рингэнд алтан медалийн төлөө гарсан Д.Отгондалай боксын багийнхныхаа сэтгэлийг сэргээн, анх удаагаа Азийн наадмын аварга ширэн бээлийтэн болсон. Ийнхүү Н.Түвшинбаяр, Д.Төмөрхүлэг, Г.Уранцэцэг, Ч.Нарантуяа, Д.Отгондалай нарын Азийн аваргууд төрсөн. Тэд Засгийн газрын 326 дугаар тогтоол болох “Олимлийн наадам, дэлхий, тивийн аварга шалгаруулах тэмцээнд амжилт гаргасан тамирчныг шагнаж урамшуулах журам” -ын дагуу шагналаа хүртэх учиртай. Тус журамд Азийн наадамд түрүүлбэл 20 сая төгрөг, мөнгөн медаль хүртвэл 10 сая төгрөг, хүрэл медаль хүрвэл 7 сая төгрөгийн урамшуулал олгоно гэж заажээ.
М.Мөнхжин
Сэтгэгдэл (4)