“АПУ” компанийн гэрээт борлуулагч “Ариун Алтан тэвш” дэлгүүрийн эзэн Б.Алтанхуяг гэх залуу есдүгээр сарын 15-ны өдөр 11:00 цагийн үед гэрээсээ гараад сураггүй болсон гэх мэдээлэл өнгөрсөн өдрүүдэд олны анхааралд байсан билээ. “УНК – 2983” дугаарын ачааны саарал микро автобустай гэрээсээ гарч Хонхороос Гачууртын чиглэлийн дэлгүүрүүдэд бараа тарааж яваад сураггүй алга болсон Б.Алтанхуягийн цогцосыг өчигдөр 16.00 цагийн үед Налайх дүүргийн гуравдугаар хороонд байрлах уурхайгаас олсон байна.
Тэрбээр 10 илүү хоногийн өмнө амиа алдсан болох нь тогтоогдсон аж. Ар гэрийнхэнд нь талийгаачийн цогцосыг нь таниулж мөн болохыг нь тогтоожээ.
Өчигдөр Б.Алтанхуягийн гэр бүлийн зүгээс хэвлэлийн хурал хийж “Манай хүн амьд мэнд олдвол боллоо. Бид хэнээс ч гомдол нэхэхгүй” хэмээж байсан ч, харамсалтай нь амиа алдаад арав гаруй хоносны дараа ийнхүү олдлоо.
Түүнийг сураггүй болсон өдөр эхнэр нь утас руу нь залгахад авахгүй байж байгаад
16:00 цагийн үед “одоохон” гэсэн мессэж бичээд л бүр сураг тасарсан гэдэг. Мессэж бичдэггүй, шууд залгадаг хүн яагаад ийм сэжиг бүхий мессэж бичсэнд эхнэр нь ихэд гайхсан тул цагдаагийн байгууллагад хандаж, эрэн хайх ажиллагаа улс даяар эхлүүлснээр, ийнхүү цогцос нь олдоод байна.
М.Сонор
Сэтгэгдэл (2)