“Miss Mongolia” гэдэг үгийг дуулаад яагаад ч юм гэнэт, охид ариун бол төр ариун гэдэг нэгэн үг санаанд буулаа. Монгол охидын манлайллын эн тэргүүнд загвар өмсөгч охид бүсгүйчүүд тодорхойлогдох учиртай.
Манай Улсын нүүр царай болсон тийм л хацар гоо бүсгүйчүүдийн тэргүүнд “Miss Mongolia” тэмцээний тэргүүн титэм хүрдэг гэж хүмүүс ойлгодог. Тийм ч байх учиртай. Сайхан бие, гоо үзэсгэлэнгээ гайхуулан алхах нь эмэгтэй хүний эрхэм дээд чанар мэдээж мөн. Гэхдээ оюун ухааны гоо сайхан гэж бас байх ёстой ба дан ганц нүүр царайных нь “арьс”-аар хүнийг тодорхойлох шиг эмгэнэл хаа ч үгүй шиг санагдана. Хармсалтай нь биеийг нь уралдуулахаас, ухааныг нь уралдуулах биш дээ, ямар.
“Монголын мисс” хэмээх энэ эрхэм алдрыг хүртдэг жил бүрийн ялагч титэмт бүсгүйчүүд чухам хаана, юу хийгээд яваад байдаг нь тийм ч ойлгомжтой зүйл биш. Ганц удаа тэргүүн титэм хүртэж хэдхэн жил загварын тайзнаа алхахаас хэтрэлгүй усанд хаясан чулуу шиг алга болцгоодог нь гэм биш зан.
Аваргын титэм авчихсан л бол мисс нэрээ ахиад цаашаа хоёр, гурав дахин хамгаалдаг баталдаг мисс шиг, миссүүд манайд хэр олон бэ гэдэг тун ч эргэлзээтэй асуудал. Аль нэг загварын шоу, тэмцээний дараа хүнтэй суулаа, хүүхэд гаргалаа, ийм ч кинонд тоглолоо, тийм ч захирал боллоо гэх гуншингуудтай хоцордог нь нууц биш.
“Miss Mongolia-2004” тэмцээний тэргүүн мисс Ч.Содтуяа, загвар өмсөгч олон улсын сайхан залуу А.Чингүүнтэй сууж нэг охинтой болоод салсан. Мөн “Азийн модель” агентлагийн захирлын хажуугаар “Содоогийн цаг”, “Сайхан” зэрэг телевизийн нэвтрүүлгүүдийг хөтөлж байсан.
Тэгвэл удаах тэргүүн мисс Б.Гантогоо “Цэвэр ус, цэнгэг агаар, ногоон төгөл” нийгэмлэгийн захирал, “Мисс-Монгол аялал жуулчлалын холбоо”-ны захирлын албан тушаалыг хашиж явсан. Түүний нөхөр Г.Сүхболд уул уурхайн чиглэлээр ажилладаг нэлээд чинээлэг нэгэн гэгддэг бөгөөд тэд нэг охинтой билээ. Түүнийг загвартай амьдралаа холбоод 10 гаруй жил болсных нь төлөө Алтангадас одонгоор шагнаж байсан явдал хэл ам таталсан хэрэг болж өнгөрсөн.
Түүнчлэн 2006 оны миссээр шалгарсан Д.Болортуяа Япон улсад болсон “Miss International” тэмцээнд оролцоод ирснээсээ хойш сураг алдарсан.
Харин 2007 оны тэргүүн мисс Б.Гэрэлчулуун “Тусгай салаа” телевизийн олон ангит кинонд, 2010 оны тэргүүн мисс Д.Бадамцэцэг “Хэцүү анги” кинонд тоглож байсныг үзэгчид андахгүй мэднэ. Тэгвэл Б.Гэрэлчулуун олон залуустай нэр холбогдож хэвлэлийнхний бай болж байгаад “Алтай Констракшн”-д ажилладаг Онон гэх залуутай сууж О.Оюу-Эрдэнэ гэх охинтой болсноор олны хэл амыг намжаасан.
Харин Д.Бадамцэцэг МУИС-ийн эдийн засгийн сургуульд сурдаг А.Алтаншагай гэх залуутай хуримлаад удаагүй байна.
Түүнчлэн 2009 оны тэргүүн мисс Х.Бадамгэрэл “Andra Model Management” агентлагийн захиралын албан тушаалтай. Дуучин Becky-гийн “My love” дууны клипэнд тоглож байгаад танилцаж хуримаа хийсэн түүхтэй. “Гоёл-2014” наадамд төрснийхөө дараахан орж байсан.
Одоо сүүлдээ мисс гэж ер нь юу хийгээд байдаг хүмүүс билээ гэсэн хошин маягийн асуулт гарах вий дээ. Төр, түмэндээ хийсэн бүтээснээрээ нэрлэгдэх нэг ч ажилгүй байхад, Монголд ийм олон миссийн хэрэг байгаа ч уу, үгүй ч үү?
Яаж ийж байгаад мөнгөтэй, төгрөгтэй эрхмүүдтэй нэр холбогдчихдог жишээ олон бий. Нэг үгээр хэлбэл энэ мисс нэр нь хүнтэй суух тасалбар нь болчихдог юм шиг санагдсаныг нуух юун. Нөгөө талаар энэ загварын тайз гээч нь хэдэн мисс нэртнүүдэд кино дэлгэц, эсвэл аль нэг бизнесийн салбар луу хөл тавихад гүүр нь болж өгдөг гэлтэй. Хайр болгон түүхтэй гэдэг шиг, мисс болгон тохирсон үлгэртэй.
Ямартай ч мисс л болчихвол юм юмны захад хүрчих юм шиг ойлголт охидод төрдөг нь нууц биш. Нээх л олон мисстэй, бараг 5 хүн тутмын нэг нь миссийн титэмтэй байх нь халаг болж. Тэгсэн мөртлөө дэлхийн мисс, тивийн чанартай тэмцээнд байнд ч үгүй банзанд ч үгүй хоцрох нь олонтай. Дэлхийд эх орныхоо нэрийг гаргаж яваа миссүүд хуруу дарам цөөн байна.
Эрэгтэй бол улаан зангиа зүүсэн улаан хувьсгаалч, улс төрч эмэгтэй бол ямар нэг мисс байдаг үлгэр үргэлжилж байна. Юм ихдэхээрээ утгаа алдана. Миссийн тэмцээн жил алгасахгүй, хэд хэдэн төрлөөр зохиогдоод жилд хэчнээн ч мисс төрдөг юм. Сүүлдээ ямар ч гэнээ шарсан тахианы мисс хүртэл гарсан шүү.
Тэмцээн хийж болох ч ховор бөгөөд чанартай, шалгуур өндөр байвал титэм зүүх хүнд нь хүртэл нэр төртэй юм даа.
П.Урнаа
Сэтгэгдэл (10)