Өмнөд хөршийн төрийн тэргүүний гэргий Пөн Ли Юаньтай манай тэргүүн хатагтай Х.Болормаа тусгай хөтөлбөрийн дагуу уулзсан юм. Уулзалтын үеэр тэргүүн хатагтай Х.Болормаа Хятадын даргын гэргийг Монголд тавтай морилохыг хүсээд айлчлалд нь амжилт хүссэн бол хариуд нь хатагтай Пөн Ли Юань Монголын сайхан оронд айлчлан ирсэндээ сэтгэл дүүрэн байгаагаа илэрхийлэв. Мэдээж энэ бол “дипломат” хэв маягийн уулзалт гэдэг нь тодорхой. Тэгвэл Си даргын гэргий, Хятадын тэргүүн хатагтай Пөн Ли Юань гэж хэн бэ гэдэгт анхаарал хандуулъя.
Оросын lenta.ru сайтад Игорь Денисовын бичсэн “Үндэстний эх” (Мать нации) өгүүлэлд Пөн Ли-Юань хатагтайн тухай юу өгүүлснийг сорчлон хүргэе. Судлаач Х.Д.Ганхуяг энэхүү нийтлэлийг орчуулсан юм. Игорь Денисов “Хятадуудын хувьд бол Пөн Ли Юань манай Алла Пугачева л гэсэн үг юм. Түүнээс гадна моод тодорхойлогч, бас армийн генералтай дүйцэх цолтой “дарга” дуучин юм. Хятад Улсын даргын эхнэр “Форбс” сэтгүүлийн “дэлхийн хамгийн нөлөө бүхий эмэгтэйн” рейтингэд Ангела Меркель, Мишель Обама, II Елизавета, Леди Гага нартай зэрэгцэн сүүлийн хоёр жил дараалан тавигдах болов.” гэсэн байдаг. Цаашлаад нийтлэлийнхээ “Тэргүүн хатагтай олны анхааралд” гэсэн хэсэгтээ “Хятадын тэргүүн хатагтай шинэ байдлаар гадаадад анх удаа айлчилсан нь хятадын олон нийтийн анхаарлыг тэр дороо татсан юм. Интернетээр Си Зиньпиний гэргий хэрхэн тансаг хувцаслаж байгааг шүүрэн авав. Москвагийн аяллын дараа нетийн сүлжээнд Пөн Ли Юаний фанат хэд хэдэн бүлэг бий болсон аж. Гэхдээ энэхүү интернет нийтлэгүүд удаан байгаагүй бөгөөд удалгүй хаагдсан юм.
Намын дээд удирдагчийн эхнэр олон нийтийн өргөн хэлэлцүүлгийн сэдэв болоход консерватив удирдагчид дасахгүй байсан бололтой. Асар удалгүй Пөн Ли Юаний хувцас болон биеэ авч явах байдлын маргаан хэвийн үзэгдэл болсон юм. Засгийн үйл ажиллагааг харуулах догматик хандлагыг өөрчлөх талаар өгсөн Си Зиньпиний сануулга үүнд нөлөөлсөн байж ч магадгүй.
Үнэндээ бол Пөн Ли Юань нөхрийнхөө тунхагласан улс төрийн зарчмуудыг өөрийн зан үйлээр бататгаж байгаа юм. Түшмэдийн даруу зан гаргаж, хүмүүсийг хүндэтгэж байна уу ? Тэгвэл симпони концертын очерт бусдын хамт зогсож буй Си-гийн гэр бүлийн фото зургийг интернетэд харуулж байна. Үндэсний үйлдвэрлэгчдээ дэмжих хэрэгтэй юу ? Тэгвэл Европт айлчлах үеэрээ Пөн Ли Юань хятадын Nubia Zini смартфон хэрэглэж байна. Энэ загварын гар утасны үнэ 300 доллараас илүү гарахгүй.
Пөн Ли Юань бүх хувцсаа зөвхөн хятад дизайнаруудаар хийлгэдэг гэж хятадын интернет бахархан бичиж байна. Нийгмийн тэгш бус харьцааг тэгшитгэж, спидтэй тэмцэх хэрэгтэй юу ? Пөн Ли Юань тосгоны сургуулийн дэмжих хөтөлбөрт оролцож, түүний идэвхитэй оролцоотойгоор ВИЧ халдвартай хүүхдүүдэд зориулсан анхны сургууль нээв. Сычуань мужид болсон гамшигт газар хөдлөлтийн дараа нэрвэгдсэн хүмүүст туслах ёстой юу ? Пөн Ли Юань тэнд өөрөө төлбөргүй концерт тоглосон ба тэр хандиваар байгуулсан бяцхан сургуулийн нэгэнд Си Зиньпин, Пөн Ли Юань нарын охин Си Минцэ ажиллаж байна. Пөн Ли Юань сүрьеэ, спидээр өвчлөгсдөд туслах Дэлхийн Эрүүлийг хамгаалах байгууллагын сайн дурын элч бөгөөд тамхитай тэмцэх идэвхтэн гэж алдаршсан байна. Тэр Билл Гейтстэй хамт идэвхигүй тамхи таталтын аюулын эсрэг хятад бичиг бүхий улаан майк өмсөн зургаа авахуулсан байна. Өмнө нь хятадын эрх мэдэлтний ямар ч эхнэр ийм зүйл хийж байгаагүй юм.
Си Зиньпин Европт хийсэн анхны айлчлалын үеэр нэг бяцхан сенсааци болжээ. Амстердам дахь хааны Ордонд болсон хүлээн авалт дээр Хятадын лидер, тэргүүн хатагтай хоёр хятадын уламжлалт костюмтай иржээ.
Өмнө нь Хятадын бүх удирдагчид ийм арга хэмжээнд барууны стандарт костюм зангиатай ирдэг байсан. Харин уламжлалт хувцсаа эхнэрүүд нь өмсдөг байлаа. Энэ бол “зөөлөн хүч”-ээ харуулсан хэрэг гэж барууныхан үзсэн юм.
Сэтгэгдэл (44)