Манай нэртэй улс төрчид, УИХ-ын гишүүд, урлаг, спортын алдартнууд анхны эхнэрүүдээ амьдрал дундаас гээж, ахин нэгийг сонгож дахин даварч гуравдагч, дөрөвдөгч, тавь дахь гэж хөвөрсөөр сүүлдээ тэдний амраг, авааль гэж ялгаж салгах бэрх болоод буй нь үнэн. Тэдний авааль, амрагуудаас мэндэлсэн үрсийг тоочвол Монголын үрс маш олон болж байгаа нь мэдэгдэнэ.
Өөрсдөө бус анхны, авааль, хоёр дахь, гурав дахь авхай нараараа өсгөж өндийлгөж байгаа хэдий ч ихэнх нь эцгийн үүрэг хариуцлагаа умартаагүйд л баярлахаас.
Хоёр эхнэртэй байхыг хууль санаачлаад хань ижилдээ хаягдаж хоцорсон ховсчин С.Хүрэлбаатар, Дархан аварга Х.Баянмөнх тэргүүтэн тун ч нарийн тооцоо хийж, нэг эрд 2-3 эмэгтэй ноогдож буйг барим тавим мэдээлж, тийм ч учраас хүүхнүүдээ харьд алдахгүйн тулд тэжээж чадаж байвал хоёр эхнэртэй байхыг хуульчилъя гэж байсан цаг саяхан.
Хэдийгээр энэ хууль ажил хэрэг болоогүй ч бодит амьдрал дээр хоёр байтугай гурван эхнэр зэрэгцүүлээд “давхиж” буй нэр нөлөө бүхий улс төр, бизнесийн эрхмүүд цөөнгүй байдгийг бид мэдэх болсоор удаж байгаа.
Тэднийг жаатай эрс гэх үү, жудаггүй эрс гэх үү, эрхэм уншигч авгай таны сонголт биз ээ. Бид зөвхөн мэдээлэх үүрэгтэй билээ л. Аавуудын баярын өдөр энэхүү аавуудыг онцлон уншигч та бүхэнд хүргэж байна.
Ингээд АЛДАРТ ААВЫН болзол хангагч олны танил эрхмүүдтэй танилцъя.
Алтны магнат биш алдарт аав
“Алтны магнат” хэмээх өнө мөнхөд дагалдах албан бус тодотголтой, Монголын толгой баячуудын нэг Ц.Мянганбаяр толгой эргэм их хөрөнгө мөнгө гэхээсээ илүү залуу амраг хүүхнүүдээр алдаршиж орхисон нэгэн. Сайнтай нь ханилж, сайхантай нь амраглаж, авсан аваагүй амрагууд гээд түүний нэр холбогдсон хүүхнүүдийн тоо алдагдах дээрээ тулж байгаа гэж болно.
Анхны гэргий Б.Болороосоо хоёр хүүхэдтэй Монголын “Дон Жуан” Мянгаа ноёнтон албан бус тоогоор бидний мэдэх 7 хүүхэдтэй гэсэн тооцоо одоогоор гараад буй. Үнэндээ бидний мэдэхгүй, бурханаас ч хүртэл нууж явдаг хүүхдүүд нэг бус байдгийг ойр эх сурвалж нь мэдээлдэг.
Үүнээс харвал Мянгаа ноёнтон авсан, аваагүй хүүхнүүдийн тоогоор ч тэр, хүүхдүүдийнхээ тоогоор ч тэр Монголын “Алдарт аав”-ын I одонг авна. Инээдтэй ч гэмээр, итгэхэд угаас бэрх нэг явган яриа байдаг нь газар ус хөндөж, лус савдаг хилэгнүүлж ирсэн нүгэл хилэнц нь зөвхөн хүүхнүүдийг баярлуулж, байр, машинтай болгосноор нимгэрнэ гэж нэгэн ламхай айлдсанаас хойш ноён магнат ийм замд эргэлт буцалтгүй шуударсан гэх яриа. Үнэн биш л байгаасай даа.
Мянгаа хүүхнүүдээрээ, Женко хүүхдүүдээрээ уралдана
Анх савхин дээл оёж, нөхөртэйгээ хамт өдөр шөнөгүй зүтгэж өнөөгийн “Женко” группын үндэс суурийг тавилцсан анхны гэргий Ц.Энхтуяа нь Х.Баттулгад хоёр охин, нэг хүү төрүүлж өгчээ. Харин хоёр дахь гэргий Анжелика нь дэрсхэн дөрвөн хүү төрүүлж өгсөн. Ээжтэйгээ оросоор, аавтайгаа монголоор ярьдаг хөвгүүддээ Х.Баттулга сайд амь шигээ хайртай гэнэ лээ.
Ингээд хоёр бүсгүйгээс нийт долоон хүүхэдтэй ноён “Женко” Ц.Энхтуяа хатагтайн ууган хүү Б.Жавхлантай нийлүүлээд тооцвол 8 хүүхдийн аав, алдартаар барахгүй алдарт аав. Хамгийн гол нь хичнээн салж, нийлсэн ч тэрээр эхнэрүүд болоод үр хүүхдүүдийнхээ төлөө бүхнээ зориулж, эцгийн үүргээ онцсайн биелүүлж яваа нэгэн. Ёстой чадаж байгаа юманд аргагүй гэгчээр сайн генээ аль болох чанаржуулан олноор үлдээх чин зорилгыг ноён сайд баримталдаг гэсэн шүү. Ийн Мянгаа хүүхнүүдээрээ, Женко хүүхдүүдийнхээ тоогоор дөрөө нийлүүлэн ижилсэж явна.
Олон эхнэртэй байхын “буян”
“Буян”-гийн Жагаа гэдгээрээ нэр цуутай Монголын зартай жентельмэн Б.Жаргалсайхан нэгэнтээ хүний өөрийн нийлсэн 6 хүүхэдтэй хэмээн сонгуулийн сурталчилгааныхаа үеэр ам алдаж байсан удаатай. Тэр цагаас хойш дуучин бүсгүйтэй амраг сэтгэл нийлж, өөрийг нь өвчсөн мэт хүүтэй болсон гээд тооцвол хэдийнэ 7-гийн тоонд хүрсэн байх магадлалтай.
Лав бидний мэдэх гурван бүсгүйгээс зургаан хүүхэдтэй. Хэзээ ч нууж, далдалж яваагүй хоёр гэргийтэй.
Жигтэйхэн эв найртай гэргий нар нь Жагаагийн найдвартай ар тал нь болдог. Харин хэнз үрийн зулай үнэрлүүлсэн дуучин П.Өнөржаргал түүнд отгон хүүг нь тэврүүлж нялхаруулсан. Мөн л Женко шиг авсан аваагүй, авааль гэргий нарынхаа хүүхдүүд болон аж амьдралд нь гар татдаггүй “Буян”-гийн буянлаг ноёнтон гэж түүнийг нэрийдэж болох юм.
“Буян” хэмээх бизнесийн вант улсыг өөрийн гараар барьж босгочихоод гэнэтхэн улс төрд орсон ноён жентельмэн чөлөө завгүй улс төрөөр өвчлилж байсан цаг саяхан. Женкогийн араас Мянгаа ноёнтонтой энэ зэрэгцэн “Алдарт аав”-ын I одон энгэртээ гялалзуулах л хүн.
Аавын уралдаанд ч аваргална
Даян аварга А.Сүхбат Монголын хамгийн олон хүүхэдтэй бөхөөр тодроод буй. Орчин үед хамгийн ихдээ гээд таван хүүхэдтэй айл өнөр олуулаа гэх тодотгол авах болсон бол Даян аварга маань долоон хүүхэдтэй гэсэн тооцоогоор Ц.Мянганбаяр ноёнтонтой ана мана үзэлцэж байгаа юм.
Зууны манлай бөх Х.Баянмөнхийн охин Б.Баясгалангаас гурван хүүхэдтэй болсны дараахан түүний дараагийн сонголт нь гэрийн үйлчлэгч бүсгүй. “Ноёд” компанийн захирал Д.Буяндоржийнд гэрийн үйлчлэгчээр ажиллаж байсан Содоо гэх бүсгүйгээс тэрбээр хоёр хүүхэдтэй гэдэг.
Бөхийн удамт энэ бүсгүй аваргыг нэг хэсэг цагаан хоолонд оруулж, ахуй амьдралынх нь хэвшлийг өөрчилж чадсан ч гэлээ сэтгэлийг нь аргамжиж чадаагүй хэмээн ойр дотныхон нь шивэр авирхийдэг.
Өдгөө албан бус тоогоор гурав дахь эхнэр Н.Гарамхандаасаа долоо дахь хүүхдээ өлгийдөн аваад буй. Аваргаас үе мултарсан бага хатан Н.Гарамханд ийнхүү аваргад хоёр дахь үрийн зулай үнэрлүүлж, Мянгаа ноёнтныг бут цохиж “Алдарт аав”ын I одонг нэр төртэйгээр гардан авах эрхэм алдрын эзэн болоод байгаа юм. Энэ бүхний эцэст анхны эхнэр Б.Баясгалан нь нөхрөө өмөөрч “Миний нөхрийн генийг авч үлдэх гэсэн эмэгтэйчүүдийг би буруутгахгүй” хэмээсэн нь агуу их уучлал гэхээс өөр юу гэх билээ.
57-тойдоо удам залгах хүүтэй болсон “Алдарт аав”
Сэтгүүлчийн ширээнээс улс төр лүү эргэлт буцалтгүй хөл тавьсан экс ерөнхий сайд асан С.Баяр Монголын улс төрийн томоохон кадруудын нэг. Хувийн болон хувьсгалын ажил амьдрал нь тун ч адармаат адал явдалтай сайд асны анхны гэргий О.Гэрэлтуяа түүнд гурван охин төрүүлж өгчээ.
Харин түүний дараагийн сонголт нь цагтаа Монголын улс төр, парламентыг бужигнуулж, эмэгтэй улс төрчдийн зангараг зааж явсан Х.Хулан хатагтай охин Дарьяаг төрүүлж өгсөн.
Хаа ч явсан С.Баяр охидууд гэргий нараа хайр халамжаар дутаадаггүй гэнэ лээ. Хоёр ч эхнэрийн нүүр үзэж дөрвөн охинтой болсон ноён экс сайд хамгийн сүүлд гурав дахь гэргий Ариунсувдаасаа нуган үр тэвэрч, жар дөхсөн насны наранд магнай хагартал баярласан нь саяхны явдал.
Тавин долоотойдоо нэгэн насаараа хүсч мөрөөдөн, сүслэн гуйсан голомт залгах хэнз үр нь С.Баяр ноёнтны өвчин хууч, улс төрийн стресс бүхнийг мартуулж, дахин төрүүлсэн гэдэг. Охинынхоо хүү Нацагийг өөрийн нэр дээр өсгөж, голомт юугаа өвлүүлэхээр зэхэж байсан тэрээр үзэсгэлэнт залуу гэргийгээ АНУ-д амаржуулсан бөгөөд Нацаг хүүгээ дүү дагуулсанд ихэд билэгшээж байгаа гэнэ лээ.
Д.Баттөрийн гранд амьдрал
“Жигүүр гранд” группын ерөнхийлөгч ноён Д.Баттөрийн хувийн амьдрал тийм ч нээлттэй биш. Шаггүй сайн барилгачингаас гадна мундаг сайн хөгжмийн зохиолж Д.Баттөрийн хувийн амьдрал яг л кино шиг, дуу шиг гэхэд хилсдэхгүй.
Анхны гэргий Сувдаагаасаа хоёр охинтой бол дараагийн гэргий Н.Эрдэнэтунгалагаас гурван хүүхэдтэй.
Өдгөө 60 насны босгыг алхах гэж байгаа Д.Баттөр ноёнтон ач нартайгаа зэрэгцүүлэн нялх үрсийнхээ дуунд ч уярсан. Үе мултарсан гурав дахь гэргий Ононгоосоо хэнз хүү, охин хоёртой гээд бодохоор 8 хүүхдийн тоо гарна.
Түүнийг дахин нэг бүсгүйтэй учир ургуулж, амьдрал зохиосон гэх шуум тархаад уджээ.
Бужигнуулдаг С.Болдсайханы бужигнасан хүүхдүүд
Их хуралд нэр дэвшихдээ сонгуулийн сурталчилгаагаа 00-ын цаасан дээр хэвлүүлж байсан энэ эр албаны салбарт ч, амин хувийн амьдрал дээрээ ч ёстой бужигнуулж ирсэн “товариш”. Ёо ёогоо ч эмчилнэ, нийтлэл ч биччихнэ, улс төрд хөл тавиад, их хуралд ч тоосоо өргөчихнө, телевизээр нэвтрүүлэг ч хөтөлчихнө, адаг сүүлд нь эмнэлэг толгойлж байна.
MCS-ийн хөрөнгө оруулагчдын нэг Д.Энхцэцэг хатагтайтай суусан биш анхны бэлэг нь жийп байсан бол өдгөө бүхэл бүтэн Сонгдо эмнэлгийг авсан тэрээр энэ эмэгтэйтэй суухаасаа өмнө ёстой бужигнуулж, бутаргаж явсан намтар түүхтэй.
Түүнтэй нэр холбогдож, дэр нэгтгэж байсан бүсгүйчүүдийн тоо ч их. Тэднээсээ төрүүлсэн хүүхдүүдийн тоо хэдийнэ долоод хүрсэн гэж байгаа. Харин хүчирхэг хүүхнүүд эрчүүдийг хэрхэн номхотгож болдгийг харуулсан ноён генералын дүү Д.Энхцэцэг хатагтай С.Болдсайхан эмчийг харин ч нэг хүмүүжүүлсэн дээ. Түүний энгэр алдарт аавын нэгдүгээр одонг өгөх гавьяатай.
Аглуугийн алаг нүднүүд зургуулаа
Хэдий алдарт аавын нэгдүгээр одонгийн зэрэгт хүрэхгүй ч гэлээ алаг нүдэн Аглуу зургаагийн зургаан хүүхдээр Монголын үрсийг маш олон болгосон жаатай эр шүү. Анхны албан ёсны гэргийгээсээ өмнө Дорнодод хайр дурслалын романс хэлхэж явсан бүсгүй нь түүний анхны хүүхдийг төрүүлсэн гэдэг.
Дараагийн эхнэр Уянгаасаа хүү, охин хоёртой бол одоогийн гэргий нь алаг нүдтэй хөөрхөн охид олныг төрүүлж өгчээ. Хамгийн үнэлүүштэй нь тэр хүүхдүүдээ хаана ч, хэнээс ч нуудаггүй.
Ө.Сайхан
Сэтгэгдэл (13)