Яруу найргийн хатан хаан СГЗ Ц.Хулангийн үдэш өчигдөр тохиов. Бид сэтгэл, оюуны цангаа юугаа тайлж хэсэгхээн хором амсхийхдээ уярал, ухаарал, гуниг, зэмлэл, нулимс амтлуулсан мөртүүдийг зүрхээ нээж сонсов. Агуу юмаа, энэ бүсгүй. Ирлэсэн тонгорог шиг хурц, эгнэшгүй их авьяастай, дэрвэгэр хормой дэрвүүлэн сэвэлзтэл алхах нь цаанаа л гал цогтой.
Тэр үзэгчдийг уйлуулж, дуулуулж, учирлаж, аргадаж, загнаж шүлгээрээ “ташуурдав”. Омог бардам юмаа, энэ бүсгүй.
Үнэн үг гашуун ч гэсэн амттай, үнэн сэтгэлийн шүлэг сонсох тусам яруу. Зав чөлөөгүй бидний амьдралд гэрлээ тусгасан үзэсгэлэнт од, завсар зайгүй тэмүүлэх гал шиг дүрэлзсэн их авьяас ... Ай Хулан хатан ямар тэнгэрлэг юм бэ.
Сэтгэл гэдэг залуухнаараа байдаг цорын ганц эрхтэн. /СГЗ Ц.Хулан/ Энэ үгийг би хувьдаа зүрхэндээ сийлэв. Тэр үнэхээр 18-т шиг гялалзаж, өнжүүлийн хөх өвгөд шиг алсын алсыг харж, бодол оюунаараа бусдаас ямагт түрүүлэхийг нь зүйрлэх зүйрлэл олдошгүй нь.
Түүний сэтгэл залуухнаараа байна, тэр цаашдаа ч залуугаараа байх болов уу. Гайхалтай юмаа, Хулан хатан.
У.Цахирмаа
фото Д.Цэгц
Сэтгэгдэл (3)