Монгол Улсын Гавьяат жүжигчин Т.Ариунаа хөлөө гэмтээсэн гэсэн мэдээлэл сонсогдлоо. Тэрээр өнөөдөр өглөө өндөр өсгийт туфльтэй явж байгаад хальт гишгиж хөлөө гэмтээн нөхөр, хүүхдийнхээ хамт Гэмтэл согог судлалын үндэсний төвд ирж эмчилгээ хийлгэж байна гэсэн яриа гарсан юм. Харин бидний авсан мэдээллээр бол дуучин бүсгүй маань удахгүй хийх гэж байгаа тоглолтдоо бэлтгэж байгаад хөлөө гэмтээсэн аж. Бид дуучин Т.Ариунаатай утсаар холбогдлоо.
-Таныг хөлөө гэмтээж гэж сонсоод залгаж байна. Хөл нь гайгүй юу?
-Гайгүй ээ, одоо яг эмчид үзүүлж байна.
-Таныг туфльтэй бэлтгэл хийж байгаад хальт гишгиж унасан гэсэн яриа гарсан байна?
-Үгүй ээ, пүүзтэй бэлтгэл хийж байгаад хальтираад уначихлаа. Шинэ пүүз болохоор хальтирчих шиг боллоо.
-Эмч нар юу гэж байна? Хөл тань гэмтсэн гэхээр фенүүд чинь санаа зовж байгаа байх?
-Гурав дахь өдрөөс хагалгаанд орох бололтой. Ерөнхийдөө гайгүй ээ. Тоглолт маань л жаахан хойшилж магадгүй нь бололтой.
Гавьяат жүжигчин Т.Ариунаа тайзнаа дуулж эхэлснийхээ 30 жилийнхээ ойд зориулсан тоглолт хийхээр бэлтгэл ажилдаа ороод байсан аж. Хэзээнээсээ л гал цогтой дуучин бүсгүй маань арван жилийн сурагч байхаасаа л дуулж эхэлсэн. Монголын рок попын алтан үеийн домог болсон “Соёл-Эрдэнэ” хамтлагт 18-хан настайдаа дуучнаар орж, дараа нь Болгарт дуулаачийн сургуульд явж байсан билээ. Тийм болохоор түүний тоглолт үндсэндээ Монголын рок попын шинэхэн үеийн түүхийг өгүүлнэ гэсэн хүлээлт үүсээд байсан юм. Хэдийгээр дуучин маань хөлөө гэмтээсэн ч гэсэн тун удахгүй эдгэж, уран бүтээлийн ажилдаа орох байх. Уншигчдынхаа өмнөөс хурдан эдгээрэй гэж ерөөе.
А.АМАР
Сэтгэгдэл (8)