2008 оны долдугаар сарын нэгний хэрэгт буруутгагдаж, гурван шатны шүүхээс ял авсан хошууч генерал Ч.Амарболд магадлангаар суллагдаад яг сарын дараа генералуудын баяраар анх удаа олны өмнө гарч ирлээ.
ШШГЕГ-аас хошууч генерал Ч.Амарболд, хурандаа Ш.Батсүх нарыг хугацаанаас нь өмнө суллах боломжтой хэмээн үзсэн бөгөөд шийдвэрийг дүүргийн эрүүгийн хэргийн нэгдүгээр шүүхийн хуралдаанаас гаргаж байв. Тэд Цагдан хорих 461 дүгээр ангид буюу “Ганц худаг”-т хоригдох хугацаандаа элдэв зөрчил, дутагдал гаргаагүй, “Хамгийн сайн хүмүүжигч” болцгоосон гэж албаны эх сурвалжууд хэлж байсан билээ.
Хэрэг явдлыг нэхэн санавал хошууч генерал Ч.Амарболд болон хурандаа Ш.Батсүх нар цэргийн тушаал авсан хүмүүс. Харамсалтай нь тэдэнд тушаал өгсөн жинхэнэ эзнийг одоо хүртэл тогтоож чадаагүй.
Тухайн үед ЦЕГ-ын даргын үүрэг гүйцэтгэгчээр ажиллаж байсан хошууч генерал Ч.Амарболд нэгэнтээ, “Би хэн нэгэн хүнд иргэд рүү буудах тушаал өгөөгүй” гэдэг. Нөгөөтэйгүүүр, тухайн үед Онц байдлын комиссыг толгойлж байсан ХЗДХ-ийн сайд асан Ц.Мөнх-Оргил шууд дээрээс нь цагдаагийн хурандаа нарт тушаал өгсөн үү гэсэн асуулт хариултгүй үлдсэн. Энэ асуултын хариу өнөөдрийг хүртэл таг чиг байдаг учраас хурандаа, генералуудаар туг тахисан гэж ярих нь бий.
Алив учир битүүлэг юм бүхэн араасаа бөөн хардлага дагуулдаг хойно. Зарим эх сурвалжууд “Генерал, хурандаа нарыг сулласан ч удахгүй Ц.Мөнх-Оргил нарыг мөрдөн шалгаж эхлэх байх. Тиймээс тэр үед Ерөнхий сайд байсан С.Баяр энэ хэргийн амьд гэрч болох биз” гэж байгаа.
Ямартай суллагдаад сар ч болоогүй Ч.Амарболд генерал бага зэрэг турсан болохоос тоосон шинжгүй генерал, хурандаа нарынхаа дунд цэмбэлзэж явна.
Холбоотой мэдээллийг энд дарж уншина уу.
М.Сонор
Сэтгэгдэл (17)