Буудлагын Д.Мөнхбаярыг иргэншлээ сольж, Герман улсын иргэн болж байхад мөн ч их дуулиан шуугиан дэгдэж байв. Эх орноосоо урвагч, эдийн шуналтай гэх мэтээр элдвээр хэлж байсан ч үнэн хэрэгтээ тамирчдын хөлс хүчийг даанч нэг үнэлдэггүй байсан тэр үеийн монгол төрийн сул дорой байдал нэг чадалтай тамирчнаа алдахад хүргэсэн гэдэг. Монгол Улсын Гавьяат тамирчин, Олимпийн хошой хүрэл медальт, дэлхийн аварга энэ бүсгүй энэ зууны эхээр иргэншлээ сольж, Герман улсын харьяат болсон түүхтэй. 1998 онд анх дэлхийн аварга болж байхдаа тэрээр Монгол улсын иргэн байв. Харин 2002 онд дахин дэлхийн аварга болохдоо Германы иргэн Д.Мөнхбаяр хэмээн цоллуулж байсан. Эх орноосоо татгалзаж, иргэншлээ солино гэдэг улсад данстай тамирчин бүү хэл жирийн иргэний хувьд ч амаргүй шийдвэр. Д.Мөнхбаярын тухайд аав ээжээсээ хоёулхнаа, дээрээ нэг эгчтэй, багаасаа өнчрөл хагацлын зовлон үзсэн, тухайн үед ганц эгч нь Германд амьдарч байсан гээд хувийн шалтгаан ч мундахгүй байсан гэдэг. Нөгөө талаар герман дасгалжуулагчтайгаа хайр сэтгэлтэй болсны улмаас ийм шийдвэр гаргахад хүрсэн гэх тайлбар ч байдаг. Тамирчин бүсгүйн анхны нөхөр нь волейболын мастер, “Уурхайчин” багийн дасгалжуулагч Баярсайхан. Цагтаа спортын сайхан хосуудын нэгд тооцогдож, олны харааг булааж явсан тэд дундаасаа нэг охинтой ч нэг л өдөр 2 тийш болсон нь хувийн амьдралын таарамжгүй шалтгаан байсан гэдэг. Тухайн үед бас ч гэж чадварлаг тамирчин, цуутай сайхан эрчүүдийн нэгд ордог байсан Баярсайхан гэмтэл авсан үетэй эхнэрийнх нь “урвалт” давхацаж, тамирчин эр “Гэмтэл минь хүндэрч, эхнэрийн маань сэтгэл улам холдож байгаа нь мэдрэгдэж байна” гэсэн утгатай ярилцлага хүртэл өгч байв. Харин Д.Мөнхбаярын зүгээс “Ирээдүйнхээ амьдралыг бодож ийм шийд гаргалаа” гэсэн тайлбар өгсөн байдаг.Өдгөө 43 настай Д.Мөнхбаярын тухайд Германы Швайнфур хотод амьдардаг. Баярсайхан ноёнтонтой усны дусал мэт адилхан охин нь хэдийнэ нас биед хүрч, ээжээсээ дутахгүй өндөр бүсгүй болсон. Эндээс явахдаа өөрөөсөө ахмад герман дасгалжуулагчтайгаа суулаа хэмээх шуугианы эзэн болж байсан тамирчин хатагтайн тухайд Тулгаа хэмээх сайхан монгол залуутай ханилж суугаад багагүй хугацааг үдэж байгаа гэдэг. Тэр бүү хэл Монгол улсынхаа иргэншлийг дахин сэргээх талаар гадуур яригдаж олныг чихийг хужирлах болсон. ССАЖЯ - ны сайд Ц.Оюунгэрэл "Тамирчдад өгдөг болсон урамшуулал нүдээ олсон хэрэг болсон. Өмнө нь гадны иргэншил авсан манай улсын тамирчид буцаад эх орондоо ирэх хүсэлтэй байгаагаа эхнээсээ илэрхийлээд байгаа" гэж хэлж байсан. Сайдын хэлсэн иргэншлээ сэргээлгэхийг хүссэн тамирчдын эхлэл нь МУГТ Д.Мөнхбаяр болж байгаа бололтой. Тийм байхыг ч олон хүсэж байгаа. Тавтай морил, Д.Мөнхбаяр аа.
Сэтгэгдэл байхгүй байна