Олон жил улсын цолонд хүрэх бөхчүүдийн тааварт дээгүүр бичигдэж явсан хүчтнүүдийн нэг бол Завхан аймгийн Идэр сумын харьяат өсөх идэр начин Ш.Жаргалсайхан. Аймгийн арслан цолтой байхдаа л ирээдүйтэй бөх гэдгээ харуулж чадсан түүнийг үнэлэх бөхийн хорхойтон хийгээд багш дасгалжуулагч олон. Их спортод эргэж буцалтгүй хөл тавьж, өмнөө тавьсан зорилгоо хоёронтоо батлаад байгаа өсөх идэр начин маань оюутан ахуйдаа нэг тасагт амьдарч байсан анд нөхдөөрөө бахархах тун дуртай. Үнэхээр ч нэг тасгийн нөхөд өдгөө баатар болох нь болж, өөрсдийн орон зайг Монгол бөхийн түүхэнд бататгаж чадсан нь гайхалтай. Тодруулбал, Олимпийн аварга, аймгийн арслан Н.Түвшинбаяр, Монгол төрийн их наадмын түрүү бөх, улсын арслан Х.Мөнхбаатар, уран барилдаанд Улсын өсөх идэр начин Э.Энхбат, Ш.Жаргалсайхан, улсын начин Ж.Гансүх гээд бие нас дэрсхэн энэ таван эрхэм. Харин Ш.Жаргалсайхан начны гэргий Оюунчимэг хэмээх бүсгүй буй. Завхан аймгийн Баянтэс сумын уугуул тэрээр өдгөө ханийнхаа ард талыг хариуцахын зэрэгцээ татварын ерөнхий газар ажилладаг гэнэ лээ. Харин өчигдөр МБӨ-нд болсон шилдэг начингуудын халз барилдаанд өсөх идэр начин маань барууныг ахлан барилдсан. Харамсалтай нь тун ч азгүй байж өрсөлдөгчиддөө тахим буулгасаар ганц ч даваа аваагүй юм. Тус барилдаанд Улсын өсөх идэр начин Э.Энхбатаар ахлуулсан зүүн жигүүрийн начингууд тэргүүлсэн бол ганц ч уналгүйгээр Р.Пүрэвдагва начин бусдыгаа хошуучилсан юм.
Сэтгэгдэл байхгүй байна