Өчигдөр “Хадгаламж зээлийн хоршоо”-ны хохирогчид мэдээлэл хийн МАН-ын дарга Ө.Энхтүвшин, Ерөнхий нарийн бичгийн дарга Г.Занданшатар, УИХ-ын гишүүн Л.Сарангэрэл нарыг АТГ-т шалгуулахаар болсон билээ. Харин сая МАН-ын ХМОНХА-ны дарга Б.Цогтгэрэлийг саатуулсан байна. Баттай эх сурвалжийн мэдээлж байгаагаар түүнийг “Ганц” худагийн урьдчилсан хорих төв рүү аваачсан бөгөөд ямар шалтгаанаар баривчилсан нь одоогоор тодорхойгүй байна. Б.Цогтгэрэл нь твиттерт идэвхитэй жиргэгч бөгөөд үзэл бодлоо чөлөөтэй илэрхийлдэг нэгэн билээ. Албан бус мэдээллээр түүнийг бусдыг доромжилсон хэмээн буруутгаж байгаа бололтой.
Түүнийг яагаад баривчилсан талаар Чингэлтэй дүүргийн Цагдаагийн газрын Мөрдөн байцаах тасгаас тодруулахад "Б.Цогтгэрэлд эрүүгийн хэрэг үүсгэсэн. Одоо хэргийг шалгахаар саатуулаад байгаа" гэлээ. Тэрбээр Орхон аймгийн орон нутгийн сонгуулиар "АН-ын төлөөлөгч ялалтын баяраа тэмдэглэж яваад хүний аминд хүрэв" гэсэн нийтлэлийг Tsag.mn сайтад нийтэлжээ. Гэтэл энэ мэдээлэл үндэслэлгүй, тийм хэрэг болоогүй хэмээн АН-ын төлөөлөгч гомдол гаргасан байна. Тиймээс энэ дагуу Чингэлтэй дүүргийн Цагдаагийн мөрдөн байцаах хэлтэст Б.Цогтгэрэлд эрүүгийн хэрэг үүсгэн шалгаж байгаа талаар мэдээлэл байна.
Сэтгэгдэл байхгүй байна