Хүүхдийн эрхийг хувиараа хамгаалъя

Төрийн байгууллагууд эрх нь зөрчигдсөн, эмзэг бүлгийн, нийгмийн халамж  зайлшгүй шаардлагатай хүүхдийн талаар иргэдийн мэдээллийг хүлээж авсан хэрнээ бодит арга хэмжээ авалгүй олон сараар удаашруулж, байгууллага хоорондоо “бөмбөг мэт шидэлцдэг” тухай иргэний журамт үүргээ дээрх байдлаар илэрхийлсэн иргэд баримттай хэлдэг. 

Тэгвэл амьдарч буй нийгэмдээ гэрэл нэмэх хүсэлтэй залуус интернетээр дамжуулан нийгмийн халамжийн үйл ажиллагааг өөрсдийнхөө хэмжээнд зохион байгуулах болжээ. Тэдний томоохон төлөөлөл нь Фэйсбүүк хуудас дахь залуу эхчүүд, бүсгүйчүүдийн Sweet Kitchen, Mommy Central бүлгүүд бөгөөд нэгхэн жилийн дотор эх хүүхдэд чиглэсэн олон хандив, тусламжийн ажиллагааг амжилттай зохион байгуулж, үр дүнд хүрчээ.

Өчигдөр буюу бямба гарагт бүсгүйчүүдийн төлөөлөл 10 гаруй иргэн ХУД-ын Био комбинат, Морингийн давааны хогийн цэгт хөдөлмөр эрхэлдэг хүүхдүүдтэй уулзаж, халуун хоол цайгаар дайлж, дулаан хувцас бэлэглэх халуун сэтгэлийн ажил өрнүүлжээ. Жавар тачигнаж, хүйтний эрч чангарсан энэ өдрүүдэд 30 гаруй хүүхэд тоглоом барьж, үзэг эвлүүлэх ёстой бяцхан гараараа хог түүж байгаад харамсч байгаагаа ээжүүд илэрхийллээ.

Хэдийгээр энэ нь нэг удаагийн арга хэмжээ боловч хүүхдийн цэцэрлэг, сургуулийн хүрэлцээ, амьдрах нөхцөл зэргээс эхлээд орхигдуулсан ажлаа эргэн харж, нэг удаа ч болов дулаан оффисоосоо гарч хотын захын дүүргүүд, хогийн цэг дээр очиж бодит байдалтай танилцаасай гэдэг мессежийг цахим ертөнцөөр дамжуулан хүүхдийн эрхийг хамгаалагчид, холбогдох эздийн сонорт хүргэхийг залуу эмэгтэйчүүд зорьсон байна.

  Та бүхэн бямба гарагийн үйл ажиллагаатай холбоотой видеог доорх линкээр хүлээн авна уу.

http://www.youtube.com/watch?feature=player_embedded&v=6wRze_eWbaY

Тайлбар: Сэтгэлийн бэлэг. Хоёр хүүхэдтэй ээжийн хүүхдүүдэд бэлдсэн амттан.

Тайлбар: Асуулт. Нийслэлийн нэг хэсэг иргэд хогийн цэг дээр амьдарч байгааг "том" дарга нар мэддэг болов уу?

Тайлбар: Хүч тэнцвэргүй тулаан. Хэн түрүүлсэн нь хожно.