Н.Энхбаярын ялыг 2.6 жил болголоо

МАХН-ын дарга Н.Энхбаяр нарт холбогдох хэргийг хянан хэлэлцэх шүүх хурал Улсын дээд шүүхэд болж өндөрлөлөө. Хурал өглөө 09.10 цагаас эхэлж, шүүх бүрэлдэхүүн дөнгөж сая шийдвэрээ гаргасан юм. Ингээд Н.Энхбаярт холбогдох “ТВ-9”, “Эрдэнэт” үйлдвэрийн хэргийг хэрэгсэхгүй болгож “Өргөө” зочид буудал, “Улаанбаатар таймс сонин”-ы хувьчлалын асуудлыг харин хэвээр үлдээсэн байна. Тиймээс Сүхбаатар дүүргийн шүүхээс МАХН-ын дарга Н.Энхбаярт оноогоод байсан дөрвөн жилийн хорих ялыг 2.6 жил болгон хөнгөрүүлжээ. Харин  “Улаанбаатар таймс сонин”-ы хувьчлалын асуудлыг хэвээр үлдээсэн болохоор До.Чулуунбаатарын ялыг хэвээр үлдээж, Ж.Мягмаржаргалын ялыг нэг жил болгон өөрчилсөн байна. Хамгийн хачирхалтай нь өнөөдрийн шүүх хурлыг МАХН-ын дарга Н.Энхбаярын гурван өмгөөлөгчийн оролцоогүйгээр шийдсэн юм. Учир нь Н.Энхбаярын өмгөөлөгч С.Нарангэрэл гадаадад байгаа бөгөөд бусад өмгөөлөгч болох  Б.Оюунбилэг, О.Сайнгэрэл нар хурал эхлэхийн өмнө шүүх бүрэлдэхүүнд гурван санал тавьж, шүүх хурлыг түр хугацаагаар хойшлуулахыг хүссэн талаар бид өмнө нь дуулгасан. Гэвч шүүх бүрэлдэхүүн тэдний хүсэлтийг хүлээн аваагүй учир өмгөөлөгч Б.Оюунбилэг, О.Сайнгэрэл нар хурлыг орхин гарсан юм. Гэхдээ хуулиндаа хуралдааныг орхин гарсан өмгөөлөгчдөд Захиргааны хариуцлагын хуулийн дагуу шийтгэл оноох заалт байдаг гэнэ. Тиймээс энэ заалтын дагуу тэдэнд захиргааны хариуцлага авах байх.