Эрхэм Ерөнхийлөгчөө,

 
Хүсэлт гаргах тухай

Эрхэм таны энэ өдрийн амар амгаланг айлтгая.

Монголын Залуучуудын Холбоо нь залуучуудын өмнө тулгамдаж буй нийгмийн асуудлыг шийдвэрлэх, тэднийг өөрсдийнх нь оролцоотойгоор хөгжүүлэх чиглэлээр олон талт ажлуудыг зохион байгуулдаг 91 жилийн түүхтэй үндэсний төв байгууллага бөгөөд 21 аймаг, 9 дүүрэг 300 гаруй сум,  гадаадын улс орнуудад  салбар зөвлөл, боловсрол, урлаг соёлын гэх мэт 16 хороотойгоор үйл ажиллагаагаа  өргөжүүлж байна.

2012 онд бид залуусын санаачлагаар “Авлига: Би авахгүй, Би өгөхгүй” аяныг Авлигатай тэмцэх газар, Транпэрэнси Интернэшнл Олон улсын байгууллагатай хамтран зохион байгуулж,   “avilga.mn” сайтыг санаачлан ажиллуулж байна.
Эрхэм Ерөнхийлөгч таны Нэгдсэн Үндэстний Байгууллагын Ерөнхий Ассамблейн 67-р чуулганы индэр дээр хэлсэнчлэн ардчилал оршин тогтнох, хөгжин дэвшихийн үндэс нь шударга ёс, ил тод байдал бөгөөд “Бид нийгэмдээ, төрийн өндөр албан тушаалтнаас эгэл жирийн иргэн хүртэл, авлигыг үл тэвчих үйлсийн төлөө ажиллана” гэсэн  хүсэл эрмэлзлэлийг тань залуус бид дэмжин, чадах чинээгээрээ хувь нэмэр оруулахыг хичээж буй нь энэ билээ.

 Эрхэм Ерөнхийлөгчөө,
Монгол Улс Ардчилсан Орнуудын Хамтын Нийгэмлэгийг даргалж байгаа нь залуус бидний хувьд тун бахархууштай  бөгөөд Монгол Улсын ардчилалын ололт амжилтыг дэлхийн улс орнууд өндрөөр үнэлж буйн илэрхийлэл хэмээн бид үзэж байна. Мөн түүнчлэн Монгол Улс Ардчилсан Орнуудын Хамтын Нийгэмлэгийг тэргүүлэх бүрэн эрхийн хугацаа нь залуус бид шинийг санаачилж хэрэгжүүлэх таатай боломж бүрдсэн үе хэмээн үзэж байна.

Өнөөдөр дэлхий дээр 2 тэрбум орчим залуусын   90 орчим хувь нь хөгжиж буй орнууд буюу ардчилал хамгийн их үгүйлэгдэж байгаа орнуудад амьдарч байгаа бөгөөд Монгол орны хүн амын 70 гаруй хувийг залуус эзэлж байгаа нь Ардчилалыг хөгжүүлэх үйлсэд залуусын дуу хоолой зайлшгүй шаардлагатай гэдгийг баталж байна.  НҮБ-ын Ерөнхий Нарийн Бичгийн Дарга Бан Ги Мүн “Залуусын дуу хоолойг сонсдог, анхаардаг байх хэрэгтэй” мөн түүнчлэн “Хэрвээ залуучуудын ирээдүй бүрхэг болж хайхрамж муутай засгийн газартай нүүр тулах аваас  тэд өөрсдийн хүсэн хүлээсэн ирээдүйн төлөө  тэмцэж эхлэх болно” хэмээн хэлсэн нь залуус бидний эрх үүрэг, хариуцлагыг бүрнээ тодорхойлж байна.
Энэ  бүхнийг харгалзан үзэж Монголын мянга мянган залуусын төлөөлөл болсон Монгол Залуучуудын Холбооноос таньд дараах хүсэлтийг хүргүүлж байна. Үүнд :

    Ардчилсан Орнуудын Хамтын Нийгэмлэгийн бүтцэд буй “Иргэний нийгмийн тулгуур”/Civil Society pillar/ бүрэлдхүүнд  2005 онд 25 шилдэг иргэний нийгмийн байгууллагаас бүрдсэн Олон Улсын Удирдах Хороо /International Steering Committee/ байгуулагдсны нэгэн адил  Монгол Улс  Ардчилсан Орнуудын Хамтын Нийгэмлэгийг тэргүүлэх бүрэн эрхийн хугацаанд 2013 онд МУ-ын санаачлагаар  Ардчилсан Орнуудын Хамтын Нийгэмлэгийн хүрээнд дэлхийн тэргүүний залуучууд, иргэний нийгмийн байгууллагуудаас бүрдсэн Залуучуудын Хороог байгуулахыг санал болгож байна.

  Монгол Улс, Польш улсын тэргүүлж буй “Ардчилалын боловсрол” ажлын хэсгийн гишүүнчлэлд иргэний нийгмийн төлөөллийн бүрэлдхүүнд Монголын Залуучуудын Холбоог багтаахыг хүсч байна. Монголын Залуучуудын Холбоо нь  МУ-ын бүх дүүрэг, аймаг, 300 гаруй сумдад салбар зөвлөлтэйн хувьд Ардчилалын боловсролын сургалтыг залуучуудад хүргэх  мөн энэ төрлийн төслийг урьд нь санаачилж байсан туршлагаас үндэслэн энэхүү ажлын хэсэгт үр дүнтэй ажиллаж чадахаа таньд  батлан хэлье.

 Дэлхийн Залуучуудын Ассамблей, Азийн Залуучуудын Зөвлөлийн гишүүн  МЗХ нь 2013 онд Улаанбаатар хотод  АОХН-ийн Сайд нарын 7-р бага хурлын өмнөх өдрүүдэд зохион байгуулагдах Залуучуудын чуулга уулзалтыг зохион байгуулах үйл ажиллагаанд туслахад хэзээд баяртай байх болно гэдгээ илэрхийлье.

 Таныг дээрх  саналуудыг хүлээн авч хамтран ажиллана гэдэгт залуус бид итгэлтэй байна.

 Залуучуудын төлөөх та бидний ажил үйлс амжилт бүтээлээр дүүрэн байх болтугай.

Хүндэтгэсэн,

 Ерөнхийлөгч
А.Мөнхбат