АНУ-ын 45 настай иргэн Жон Мартин Кийныг хөнөөсөн хэрэгт Дархан-Уул аймгийн харьяат 24 настай Ч.Баттуулыг сэжиглэн, байцааж байгаа билээ. Түүний буруутай нь тогтоогдож, яллах шүүх хурал нөгөөдөр буюу пүрэв гаригт товлогдсон тухай Тайваны сонин хэвлэлээр цацсан байна. Энэхүү шүүх хурлын талаар Монгол дахь АНУ-ын элчин сайдын яамаас түүнд мэдэгдсэн байна. Түүний эхнэр нь “Ч.Баттуулд цаазаар авах ял онооно гэдэгт итгэж найдаж байна” гэж хэлсэн байна.
Тодруулахад өнгөрсөн нэгдүгээр сарын 5-ны өдөр манай улсын хилээр орж ирсэн Америк иргэн Жон Мартин ор сураггүй алга болжээ. Монголд бизнес эрхлэхээр явсан хүүгийнх нь өмнөөс Ч.Баттуул хоёр сарын турш завгүй байгаа хэмээн хариулж байсанд эх нь сэжиг авч Монгол дахь АНУ-ын элчин сайдын яамд эрэн сурвалжилж өгнө үү хэмээх хүсэлт тавьжээ. Талийгчийн цогцсыг гуравдугаар сард Төв аймгийн Эрдэнэ сумын нутаг, Цонжин болдгийн орчмоос олсон юм. Гэмт хэрэгт сэжиглэгдсэн Ч.Баттуул “Жон Мартин Кийныг ирсэн өдрийнх нь маргааш буюу нэгдүгээр сарын 6-ны өдөр хөнөөсөн. Зургаан удаа буудсан. Түүнийг Эрдэнэ сумын нутагт аваачиж амь насыг нь бүрэлгээд хэргээ нуухын тулд цогцсыг нь булсан” хэмээн мэдээлээд байсан билээ.
Ч.Баттуулын хувьд Дархан хотноо төрсөн бөгөөд Тайваний технологийн их сургуульд сурч байсан. Тэрээр Монголдоо том хэмжээний зочид буудал барих зорилгоор энэхүү хэргийг үйлдсэн аж. Түүнээс их хэмжээний хөрөнгө мөнгө гаргуулж ирсэн өдрийнхөө маргааш нь ийнхүү хэрэг үйлдсэн байна. Шүүх хурал энэ пүрэв гарагт болох юм байна. 
Сэтгэгдэл байхгүй байна