Амлаж байна

Парламентын сэтгүүлчээс их улстөрд хөл тавьсан цөөн улстөрчийн нэг бол МАН-ын дарга Ө.Энхтүвшин. Нам, төр, засгийн ажлын аль алиных нь тэргүүн эгнээнд явж, ардчилсан төрийн бодлогыг тодорхойлолцож ирсэн энэ эрхэм Монгол Ардын Нам сөрөг хүчин болсон эгзэгтэй цаг үед даргаар нь ажиллах хариуцлагатай үүргийг хүлээсэн билээ. Нэгэн үе намдаа жигүүр хүртэл байгуулж шинэчлэлийн туг нь болж явсан түүний туршлага, зангараг, шинэчлэгч чанарыг өндрөөр үнэлсний бодит илэрхийлэл бол энэ удаагийн томилгоо гэхэд болно. Угаас МАН-ын даргын суудалд аль хэдийнээс нэр нь дурсагдаж ирсэн тэрээр саяхан нэг хэвлэлд өгсөн ярилцлагадаа “Манай нам цэгцтэй бодлоготой, шуурхай, дайчин сөрөг хүчин байна” хэмээн мэдэгдсэн удаатай. Ямартаа ч түүнийг энэ засгийн газрын эсрэг хэр зоригтой, тууштай тэмцэгч байхыг л харах үлдлээ.