Монос монополь тогтооно

Тэртээ 2008 оны сонгуулиар патриарх үзлээрээ алдартай хаа холын Сүхбаатараас нэр дэвшиж, Алтан овооны халуун наранд дээлтэйгээ хатаж, хамаг байдгаа алдсан Л.Эрдэнэчимэг авхай энэ удаад Сонгинохайрханд нэр дэвшин ялалт  байгуулж Монголын улс төрд ширээний ард шилээ маажиж суух эрхмүүдийн тоог нэгээр нэмсэн. Уг нь гадна, дотны увиагүй бизнесменүүд шиг газрын буянаар хөрөнгөжиж, уул уурхайгаа ухаж төнхөөгүй, улс төрийн өндөр албан тушаал хашиж төрийн хөрөнгө рүү гар дүрээгүй гэдэг нь түүний бахархал. Харин гахай үүрч, ганзагын наймаа хийж хүйтэн, ширүүн бүхнийг даван туулсаар “Монос” гэх эмийн сүлжээ дэлгүүрийг Монголдоо анх удаа бий болгосон дайчин бүсгүй гэдэг. Гэхдээ эмийн бизнес эрхэлнэ гэдэг нэлээн танил талтай, өв хөрөнгөтэй хүний хийх ажил. Эл бизнесийг тун ч амжилттай хийж яваа Л.Эрдэнэчимэг хатагтай УИХ-ын гишүүн авхай болохоосоо өмнө мансууруулах болон сэтгэцэд нөлөөлөх эм бэлдмэлүүдийг хууль бусаар худалдаалсан хэрэгт холбогдон УМБГ-т шалгагдаж дуулиан тарьж байсан удаатай. Дэлхий дээрх хамгийн ашигтай бизнес хар тамхиных байдаг гээд бодохоор энэ бизнесээс Л.Эрдэнэчимэг гишүүн чамгүй ашиг олдог биз. Уг нь УИХ-ын гишүүн баймааргүй дүр төрх ханхийдэг тэрээр парламентын эмэгтэй гишүүдийн бүлгийн даргаар сонгогдчихсон тууж яваа нь бүр сонирхол татаж буй. Эм, тарианаас өөр мэдэх зүйлгүй энэ нөхрийн толгойг улс төрийнхөн үнэлдэггүй нь нууц биш.  Ямартаа ч тэр одоо УИХ-ын гишүүн болсон болохоор Монголд “Монос” монополь тогтоох нь тодорхой.