Өчигдөр “Орифлэйм” ХХК-ийн Ерөнхийлөгч асан Г.Оюунгэрэл “Өөрөөр сэтгэж, өөдрөг амьдаръя” ном гаргасантайгаа холбогдуулан хэвлэлийн хурал зарласан юм. ОХУ, МУИС, Тайланд, Швейцарьт боловсрол эзэмшсэн тэрээр сүүлийн жилүүдэд уншиж, судалсан 700 орчим эрдэм шинжилгээний бүтээлд тулгуурлан энэ номоо бичсэн байна. Номын гол зорилго нь зөв хүн байх, 2012 оны 12 дугаар сарын 21-нд загасны эринээс бумбын эринд шилжих шилжилтэнд хэрхэн бэлтгэх талаар нийтэд таниулах явдал гэнэ. Тэрээр сүүлийн жилүүдэд оюун ухааны бясалгал хийж, улмаар зарим эрдэмтдийн батлан хэлдэг дэлхийн сүйрлийн талаар өөрийн гэсэн байр суурьтай болжээ. Г.Оюунгэрэл 168 хоногийн дараа дэлхий сүйрэхгүй, харин энергийн түвшний цэвэрлэгээ хийгдэж, хар муу санаатай хүмүүсийн зөвхөн хувцас нь үлдэж, хумхын тоос болно гэж хэвлэлийн хурлын үеэр өөртөө итгэлтэй ярьж байсан юм.
Хатагтай Г.Оюунгэрэл өнгөрсөн УИХ-ын сонгуульд МАХН-МҮАН эвслээс нийслэлийн 28 дугаар тойрог, Чингэлтэй дүүрэгт нэр дэвшсэн. Улстөрд хүч үзсэн нь ч энэ бузар булай зүйлийг таньж мэд гэсэн далд хүчний даалгавар байсан гэж ярьж байлаа. Тэрээр 169 хоногийн дараа шударга бус, хар муу санаатай хүмүүс бүгд хумхын тоос болно, тэр хүртэл би яагаад хүлээж болохгүй гэж яриагаа дуусгасан юм.“Орифлэйм”-ийн бизнесийг монголд нэвтрүүлж, олон зуун хүнийг ажлын байртай, өмч хөрөнгөтэй болох замыг нээсэн гээд энэ эмэгтэйн гавъяа их. Үүнийг үгүйсгэх хүн байхгүй. Харин нийтийн өмнө хүлээсэн хариуцлагатай Г.Оюунгэрэл хатагтай зарим хүний инээд хүргэж, зарим нэгэнд айдас төрүүлэхээр ийм мэдэгдэл хийх нь хир зохимжтой юм бол?
Сэтгэгдэл байхгүй байна