Ардчилсан Монгол улсын иргэд Үндсэн хуулиар олгосон сонгох эрхээ эдэлж 2012 оны УИХ, НИТХ-ын сонгуулийн санал хураалтдаа оролцлоо. Сүүлийн сар орчмын хугацаанд сонгуулийн сурталчилгаанд бөмбөгдүүлж, улстөрөөс залхах тийшээ хандаад байсан иргэд сонгуулийн дараа наадам хэмээн Ардын Хувьсгалын 91 жилийн ойн баяр наадмыг догдлон хүлээж байна. Ирэх наадмын өнгө болгож грандньюс сайт үндэсний бөхчүүдийн бэлтгэл сургуулилалтын тухай сонирхолтой мэдээллийг дуулгах гэж байна. Энэ жил “Хилчин спорт хороо”-ны 50 гаруй бөхчүүд хуучнаар Бугын САА-д бэлтгэл сургуулилалтдаа гарчээ. Бөхчүүд өглөө 5 цагийн орчимд босч уул өөд гүйгээд 7 цагаас өглөөний цайндаа ордог байна. Ид бэлтгэл сургуулилалтынхаа үед бөхчүүд нэг удаад энгийн эр хүнийхээс 3 дахин их хоол иддэг. Тийм ч учраас “Хилчин спорт хороо”-ны бөхчүүд өдөртөө 2 хонь, 50 кг гурил хэрэглэж байгаа гэнэ. Ер нь дасгалжуулагч бөхийнхөө хүч тэнхээ, уран мэх, тэсвэр хатуужилд нөлөөлдөг бол тогооч хүн бөхчүүдийн эрүүл мэнд, хүнсний аюулгүй байдлыг хамгаалдаг байна. Иймээс ч долоо хоног бүр амны усаа лабораторын шинжилгээнд оруулж, бөхчүүдэд ямааны мар, шар, цагаан будаа зэргийг тас хорьж байгаа гэнэ. Үндэсний бөхөөр хичээллэж байгаа хүмүүс махан хоолоо л түлхүү хэрэглэх ёстой учраас хүнсний ногоог багахан, өдөртөө 10 кг-ыг хэрэглэж байгаа ажээ. Зураг дээр Улсын начин Ц.Ганхүү. 2012 оны Өвөрхангай аймгийн золголтын үеэр.
Сэтгэгдэл байхгүй байна