Үндэстэн дамнасан зохион байгуулалттай гэмт хэрэгтэй тэмцэхэд тулгамдаж буй асуудлын талаар эрдэм шинжилгээний бага хуралыг Дотоод хэргийн Их сургууль амжилттай зохион байгуулж өнгөрсөн байна. Үүнтэй холбогдуулан өнөөдөр хэвлэлийн бага хурал зарлаж мэдэгдэл хийлээ. Үүнд: Дэлхий дахинд үндэстэн дамнасан гэмт явдал өсөн нэмэгдэж, нарийн зохион байгуулалттай, нуугдмал хэрэгт шилжиж, мөнгө угаах, хүн худалдаалах, мансууруулах бодис хил давуулан наймаалах зэрэг нийгмийн хор аюул ихтэй гэмт хэргүүд нэг улсын хил хязгаараас халин, улс орныг дамжин үйлдэгдэж байна. Үндэстэн дамнасан зохион байгуулалттай гэмт хэрэгтэй тэмцдэг олон улсын, арга туршлагаас судлах, тэдэнтэй хамтран ажиллах, төрийн байгууллагын үйл ажиллагаа, зохион байгуулалт, техник хэрэгслийг хөгжүүлэх стратеги, төрөөс баримтлах бодлогыг тодорхойлоход дэмжлэг үзүүлэх зорилгоор эрдэм шинжилгээний хурал зохион байгуулсан байна.
Энэ олон улсын эрдэм шинжилгээний бага хуралд дотоодын 70 байгууллагын 140 төлөөлөл, гадаадын таван улсын 10 төлөөлөгч, 150 гаруй төлөөлөгч оролцсон байна.
Олон Улсын эрдэм шинжилгээний хурлаар үндэстэн дамнасан зохион байгуулалттай гэмт явдал, хар тамхи, мансууруулах бодис, сэтгэцэд нөлөөлөх бодисын хууль бус эргэлт, мөнгө угаах, хүн худалдаалах гэмт хэрэгтэй тэмцэх, тэдгээрээс урьдчилан сэргийлэхэд тулгамдаж буй асуудал, түүнийг шийдвэрлэх арга замыг хөндсөн 31 илтгэлийг эмхтгэн нийтийн хүртээл болголоо. Мөн оролцогчдоос терроризм, мэдээллийн аюулгүй байдал, соёлийн өв, үнэт зүйл зэрэг бусад үндэстэн дамнасан зохион байгуулалттай үйлдэгддэг гэмт хэргийг хамруулах санал асуудлууд гарсан байна.
Сэтгэгдэл байхгүй байна