6 дугаар сарын 1-11ний хооронд Испаний домогт дуурийн дуучин Домингогийн нэрэмжит “The Placido Domingo’s Operalia” тэмцээнээс зохиогдож, МУГЖ, баритон Э. Амартүвшин тэргүүн байр эзэлсэн тухай бид мэдээлсэн. Тэрээр өнөөдөр эх орондоо газардаж ДБЭТ-т хэвлэл мэдээллийнхэнтэй уулзсан юм. Э. Амартүвшин залуу дуурийн дуучдыг гаргаж ирэх, олонд таниулах ач холбогдолтой, жинхэнэ дуучин, уран бүтээлчдийг дээдэлсэн өндөр зохион байгуулалттай тэмцээнд тэргүүн байр эзэлсэндээ сэтгэл маш хангалуун байна хэмээн яриагаа эхлүүллээ.Дэлхийн хэмжээнд Мадрид, Парис, Токио, Москва зэрэг дэлхийн томоохон хотуудад 1993 оноос хойш уламжлал болгон зохиогдож байгаа энэхүү уралдаанд энэ онд нэг мянга гаруй хүн мэдүүлэг, хоолойн бичлэгээ ирүүлжээ. Шалгаруулалтад 19 орны эрэгтэй, эмэгтэй тус бүр 20 дуучин тэнцэж, эхний шатнаас 7 хүн хасагдаж, 7 орны 13 оролцогч дараагийн шатанд өрсөлдөх эрхээ авчээ.
“The Placido Domingo’s Operalia” тэмцээн 20 жилийн түүхэндээ анх удаа тэргүүн байрыг хоёр хүнд зэрэг өгсөн байна. МУГЖ Э. Амартүвшнээс гадна АНУ-ын дуучин контратенор Антони Рот Гостанза “The Placido Domingo’s Operalia-2012” тэмцээний тэргүүн байр эзэлжээ.
Сэтгэгдэл байхгүй байна