Улаанбаатар хотын оршин суугч, шинэ эцэг эхчүүдийн толгой сэгсрэн халагладаг зүйл бол яах аргагүй хүүхдийн тоглоомын талбай. Ардчилсан нийгэмд шилжихийн өмнө орон сууц, хүүхдийн цэцэрлэгийн талбайд суурилуулсан хэдэн төмөр тоглоом, урд хөршөөс авчирсан цөөн нэр төрлийн хугархай, эвдэрхий хуванцар тоглоом дээр ээлжлэн тоглох бяцхан үрсээ харахад өр эмтэрмээр байдаг. Ямар сайндаа л Үндэсний Соёл Амралтын хүрээлэнд орсон хүүхэд дуу алдаж, гарахгүй гэж уйлж эцэг эхээ сандаргаж байхав. Үүн дээр “бизнесмен” ах нар байгаа хэдхэн тоглоомын талбайг хоёр алхам явж чадахгүй хөгшид, хүүхдүүдээс дээрэмдэн газартай нь тэгшлэн барилга сүндэрлүүлж байгааг дурсах ч хэрэггүй.Тэгвэл манайхны бүхий л үлгэр дууриаллаа авч, жишээлэн ярих дуртай АНУ-ын хамгийн сонирхолтой 9 тоглоомын талбайн зургийг харцгаая. 2012 оны Парламентын сонгуульд олон олон хүүхдийн тоглоомын талбай барьж өгнө хэмээн амлаж байгаа ах эгч нар санаа авах биз ээ.
1. Миссури мужийн С. Луис хотын музейн тоглоомын талбай. Дэлхийн соёл иргэншил мөхсөний дараа хүүхдийн тоглоом нэг иймэрхүү байх болов ээ гэх хийсвэрлэл дээр энэ талбайг хаягдал материалаар босгожээ.
2. Хавайн Big арал дээрх тоглоомын талбай. Мушгиралдсан гулсуур, галт тэрэг, далайн хөлөг онгоц барьсан, авирах мацах хэсэгтэй. Нүд алдам сайхныг харан, шатар тоглон толгойгоо сэргээх хүсэлтэй хүмүүст зориулсан ширээ сандал ч бий.
3. Виржиния мужийн Фэйрфакс Каунтид орших соёл амралтын хүрээлэн. Энэ асар том тоглоомын талбай нь хүүхдийн биеийн бүх булчинг ажиллуулах зорилготой хөгжил, биеийнх нь онцлогт тохирсон олон тоглоомтой. Түүнчлэн тэргэнцэр дээр суудаг хүүхдүүд болон бусад хөгжлийн бэрхшээлтэй хүүхдүүд хүртэл тоглож, зугаацаж болохоор маш эвтэйхэн юм байна.
4. Сан Франциско хотын төвд байрлах Москоне Хурлын Төвийн дээвэр дээрх тоглоомын төв 6 метрийн өндрөөс гулгах гулсуур, хөвсгөр, резинэн тоглоомуудтай.
5. 8 сая хүн амтай Нью-Йорк хотод 500 хол давсан хүүхдийн тоглоомын талбай бий. Та бидний харж буй энэ талбай маргаангүй хамгийн шилдэг нь аж. Авирах мацах байгууламж, элс, хүүхдүүдийн өөр хоорондоо харилцаж, хамтдаа хөгжилдөхөд зориулсан олон тоглоомтой.
6. Шинжлэх ухаанчдын тоглоомын талбай. Нью-Йорк хотын Шинжлэх ухааны төв дэх тоглоомын талбай нь улсдаа энэ төрлийн хамгийн том нь. Хүүхдүүд дуу чимээ, гэрэл, механик хөдөлгүүр зэргийг өөрөө туршилт хийн мэдэрч, эсвэл паркын шинэлэг тоног төхөөрөмж дээр тоглож болно.
7. Калифорн мужийн Сан Габриелд орших Ла Лагуна тоглоомын талбайд цементэн 14 том мангасын баримал бий. Мексикийн уран бүтээлч Бенжамин Домингиз 2006 онд энэ газрыг шинэчлэн дахин нээсэн байна.
8. Мөн тус мужид орших адал явдалд дурлагчдын тоглоомын талбайг харж байна. Энд хөрөө, алх, будаг гээд өөрөө өөртөө адал явдал бүтээх бүх хэрэгсэл бий.
9. Остин дахь Төсөөллийн тоглоомын талбай. Архитектч Дэвид Роквелл энэхүү хайрцаг доторх тоглоомын талбайг байгуулжээ. Хүүхдүүд эдгээр хөнгөхөн блокуудыг хүссэн газраа зөөн сэтгэмжээрээ тоглож болох юм.
Сэтгэгдэл байхгүй байна