Сэтгүүлч М. Уранчимэгийн “Гранд Хүмүүс” номын хурим өнөөдөр 12 цагт “Интерном” номын их дэлгүүрт ёслол төгөлдөр болж өнгөрлөө. Түүний ярилцлагын түүвэр номонд монголын улстөр, урлаг, спорт, бизнесийн 32 эрхмийн онц сонирхолтой ярилцлага багтсан тухай бид мэдээлж байсан. “Гранц Хүмүүс” номын хуриманд ахмад зохиолч Чинагийн Галсан, Долгорын Цэнджав, Ц. Хулан, Б. Шүүдэрцэцэг, яруу найрагч Н. Гантулга, Сангийн дэд сайд Ч. Ганхуяг, Үндэсний Цэцэрлэгт хүрээлэнгийн захирал Б.Саранчимэг, ДУЭТ-ийн захирал Б.Сэргэлэн, МУГЖ С. Мөнгөнцэцэг , “Polo” С. Эрдэнэчимэг нарын хүндэт зочид хүрэлцэн ирж, яруу найрагч Б.Төгсжаргал хөтлөн хүргэлээ.
Сэтгүүлч М. Уранчимэг номын баяраа нээcний дараа, сэтгүүлч До. Цэнджав шавийнхаа анхны номыг өөрийн бичсэн “Мянган цэн үг” хэмээх номоороо мялаасан юм. Тэрээр “Гранд Хүмүүс” номонд гранд, үлэмж төгс төгөлдөр хүмүүс, тэдний дотоод ертөнц, өөрөөсөө ч нууж явдаг нууцуудыг ил гаргасан гайхалтай ярилцлагуудыг багтаажээ хэмээн үнэллээ. Сэтгүүл зүйн ярилцлагын гол нь өөрийгөө илэрхийлж, үгээ хэлж чаддаг хүмүүсийг эрж олохдоо байдаг, энэ номонд бүхэл бүтэн түүх, гүн ухаан, соёл, гоо сайхныг цогцолсон байна гэж До. Цэнджав зохиолч “Гранд Хүмүүс” номын тухай сэтгэгдлээ хуваалцсан юм.
Яруу найрагч Цоодолын Хулан Монгол улс сүүлийн жилүүдэд газрын хэвлийгээс эрдний талстуудаа нээж байгаа ч бүх салбарт хүнийг нээж чадаагүй. Хүний сэтгэлийг номын хуудас шиг дэлгэж, эргүүлж чаддаг сэтгүүлч бол миний эрхэм дүү, эрхэм найз Манханы Уранчимэг юм аа. Сэтгүүлч Уранчимэгийн хүний сэтгэл рүү өнгийж, сайхныг нь олж харъя гэж эрмэлздэг чанар олон сайхан хүний ярилцлага, ном боллоо хэмээн Ц. Хулан үгээ төгсгөлөө.
Сэтгүүлч М. Уранчимэгийн өнөөгийн Сангийн дэд сайд Ч.Ганхуягтай 2008 онд хийсэн ярилцлага “Гранд Хүмүүс” номын нэг хэсэг болсон. Тэрээр номын нээлтэнд зориулж үг хэлэхдээ Ч. Ганхуяг “Энэ ном 21 дүгээр зууны эхний хагаст амьдарч байсан хүмүүсийн юу бодож, сэтгэж, мөрөөдөж байсны баталгаа боллоо” гэсэн юм.
Тэр бүр номын баярт хүрэлцэн ирж, дотоод сэтгэлээ нээдэггүй дэлхийд танигдсан монгол зохиолч Чинагийн Галсан энэ хуримын хүндэт зочдын нэг яах аргагүй мөн юм. Тэрээр “Гранд Хүмүүс” номыг бүүвэйлсэн нь тэнд хурсан хүмүүсийн сэтгэлийг ихэд хөдөлгөж чадлаа. Ч. Галсан гуай “Шинэ номоо гар дээрээ авахад амаржих газраас нялх үрээ гарч ирэхэд тэврэх мэт өег сэтгэл төрдөг. Би 4 хүүхэдтэй, хүүхдээ тэврээд бүүвэйлж байхдаа би сайн сайхан зүйлсийг бодож, зохиож мөрөөддөг байсан гээд Уранчимэгийнхээ энэ хүүхдийг / “Гранд Хүмүүс” ном сурв./ би өөрийнхөө хэлээр бүүвэйлж өгье хэмээн бүүвэй аялсан юм.
Сэтгүүлч, яруу найрагч Н. Гантулга найз Уранаадаа “Гранд” хэмээх нэрийг брэнд болгож, үе үеийн “Гранд Хүмүүс”-ийг бидэнд хүргэхийг хүсч, алд цагаан хадаг дэлгэн “Урлагийн түүх” номоор бэлэг барьсан бол сэтгүүлч, зохиолч Б. Шүүдэрцэцэг номын зохиогчийн сэтгүүл зүйн салбарт хөл тавьж байх үеийг дурссан юм. Арав гаруй жилийн өмнө М. Уранчимэг мэдээ бичихдээ ч сэтгэлээ шингээдэг, цаг үргэлж бичлэгийн эрэл хайгуул хийдэг байсан учир ирээдүйд ихийг бүтээх сэтгүүлч болно гэдэгт дэгжин зохиолч Б. Шүүдэрцэцэг итгэлтэй байжээ.
Ийнхүү “Гранд Хүмүүс” номын баяр ахмад, туршлагатай зохиолч, сэтгүүлчдийн үнэлэлт дүгнэлт, сайшаалыг харамгүй сонссон, элит эрхмүүд, зохиогчийн дотны хүмүүс, хэвлэлийнхний хамт сайхан болж өнгөрлөө.
Номын хур аривжих болтугай!
Сэтгэгдэл байхгүй байна