“Өдөн дэр”-ийн С.Халиунаа амаржиж, Швейцарь Отгоод үрийн зулай үнэрлүүллээ

Монголдоо л шинэлэг, зоримог алхам хийж, телевизийн урлагт шинэ хуудас нээсэн энэ бүсгүйг “Өдөн дэр”-ийн С.Халиунаа гэдгээр нь монголчууд андахгүй. Монголжин гоо төрхтэй хөтлөгч бүсгүй ОК савангийн рекламанд тоглож анх үзэгчидтэй танилцаж байсныг ч уншигчид маань санаж буй байх аа. Хоёр жилийн өмнө хувийн амьдралдаа санаа тавьж, амьдралынхаа ханийг эргэлт буцалтгүй сонгосон нь алдарт “швейцарь” Отгоо байв. Гадаад, дотоодын шоронд хоригдож, их юм үзсэн толгой халхын сайхан хүүхнүүдээс хүссэнээ өөрийнх болгож явсан жаатай эрсийн нэг. Тиймдээ ч хэр баргийн аавын хүүг тоож харахгүй хөтлөгч бүсгүйгээр цайгаа чануулж, түүгээр барахгүй хөл хүнд болгож дөнгөсөн биз ээ. Хурим найр гэж сүрхий юм хийгээгүй ч хосууд тун ч халуухан, аз жаргалтай, хангалуун чинээлэг амьдардагийг ойр дотныхон нь шагшдаг. Угийн ухаан, сүйхээ нь хол тасраад явчихсан ноён Д.Отгонжаргал эрчүүдийн нүд хужирлаж явсан хүслэнт бүсгүйг өөрийнх болгосныг хэлэх үү, уул уурхайн бизнест тун ч одтой яваа гэнэ лээ. Хөл хүнд болсноосоо хойш нуувчинд орсон Халиунаа хатагтайн хөл хүнд төрхийг бид танд анхлан та бүхэндээ хүргэсэн. Хөтлөгч бүсгүй 5-р сарын 5-ны өдөр “Хатагтай” эмнэлэгт амаржиж, хүүтэй боллоо. Монголын анхны төрөх ор бүхий эмэгтэйчүүдийн клиник эмнэлэг “Хатагтай” нэрт эмч В.Отгонболдынх гэсэндээ чанартай үйлчилгээ, тав тухаараа дээдсийн хүрээний хатагтай нарыг хошууруулж ирсэн уламжлалтай. Тус эмнэлэгт эсэн мэнд амаржсан С.Халиунаа ийн Швейцарь Отгоод үрийн зулай үнэрлүүлж, аав болголоо. Ээж, хүү хоёрт эрүүл энх, аз жаргал хүсье.