ТОП 100 аж ахуйн нэгжийн эрэмбэ гарч Монгол Улсын топ баян гэр бүлүүд дээрээс доош дахин жагслаа. Жагсаалт жил болгон хөдөлж байдгийн хажуугаар шинэ тоглогчид олноор ирж буй нь сонирхолтой. Бид энэ удаад олны танилууд дуулиантай гэр бүлүүдээс сорчлон хэрхэн улс эх орныхоо алтан сан хөмрөгт хувь нэмрээ оруулсныг тодотгож байна.
Н.Нямтайшир ₮4.8 их наядын татвар хураамж төлж, 5000 гаруй тогтвортой ажлын байр бүтээв
Уул уурхайгаа тавиад туучихсан Оюутолгойн гэрээ дээр одоо ч хэрүүлтэй төслийг эхлүүлсэн хүмүүс “жангаа идэх” шахаж байгаа ч Оюутолгой ТОП 100 аж ахуйг 4 дэх жилдээ тэргүүлсээр байна. Мөнгөөр зодсон хүн хүч ихтэй том зах зээлд том тоглогч хойно аргагүй биз. Тэгвэл Оюутолгойн дараа хоёрдугаарт эрэмбэлэгдэх их бүтээн байгуулалтыг Монгол хүн хийсэн нь Н.Нямтайшир ноёнтон. Тэр ямар хурган инфлюнсер бацаан байгаа биш “Би бизнес хийхдээ …” гэж хэдэн халтар лайк цуглуулж подкаст хийж ярьж суух ч үгүй. МАК Монгол Улсын ТОП-100 аж ахуйн нэгжийн II-т эрэмбэлэгдэх хүртэл тэртээ 1993 оноос хойшхи хичээл зүтгэл хөдөлмөр оршжээ. Оюутолгой сураггүй байхад одоогийн улстөрчид хэл, хөлд ороогүй байхад Н.Нямтайшир эхлүүлж чадсан байна. 1993 онд уул уурхайн хайгуул, олборлолтын чиглэлээр үйл ажиллагаагаа эхэлсэн тус компани өдгөө уул уурхай, хүнд үйлдвэрлэл, геологи хайгуул, барилгын материалын үйлдвэрлэл, эрчим хүч, аялал жуулчлал, агаарын тээвэр, хөдөө аж ахуй гэсэн үндсэн долоон чиглэлд үйл ажиллагаа явуулж байна.
Н.Нямтайшир ноёнтон өнгөрсөн 33 жилийн хугацаанд улс, орон нутгийн төсөвт ₮4.8 их наядын татвар, хураамж төлж, 5000 гаруй тогтвортой ажлын байр бий болгосон аж. Монгол Улс одоо л үйлдвэрлэл ярьж, үйлдвэр барихын чухлыг ойлгож ухуулж байхад Н.Нямтайшир эрдэс түүхий эдийг олборлон боловсруулж, эцсийн бүтээгдэхүүн болгон дотоодын зах зээлд нийлүүлэх европ стандартын 7 барилгын материалын үйлдвэр байгуулсан байна. Бахархал төрж байна.
Улс төрд шургалаагүй цор ганц гэр бүл “Макс”-чууд 14-т мөнчгөрөөрөө жагслаа
Мөрөөрөө морь малаа уясан шигээ нисдэг тэргээ хөлөглөн даруухан амьдардаг МАКС группын ахан дүүс өнөөг хүртэл улс төрд ороогүй нь сайшаалтай. Хүн чаддаг юмаа хийх сайхан шүү дээ. “Макс групп”-ийн хамт олон үндэсний хэмжээний мега төслүүдийг амжилттай хэрэгжүүлж эхэлснээр 2032 он гэхэд ДНБ-ий 5%-ийг дангаар бүрдүүлэх зорилт тавин ажиллаж байгаа. 6500 гаруй ажилтантай өнөр бүлийнхэн энэ удаад “ТОП-100 аж ахуйн нэгж”-ийн 14-р байрт эрэмбэлэгдэн, өмнөх жилийн амжилтаа нэг байраар ахиулжээ. Хүй 7 худгийн хамгийн баян алтан шахуу гэртэй хур хөрөнгөлөг гэр бүл 14-т гэхлээр “Баян Монголчууд” олон байна гэсэн үг. Иргэн баян бол улс баян гэж үнэн үг шар тос.
Хамгийн даруухан баян “Алтан жолоо” групп 23 дугаар байрт эрэмбэлэгджээ
Бидний сайн мэдэх “Арвайн үндэс”, Carefour, Сансар сүлжээ дэлгүүр гэхчлэн хэзээнээс нэр нь танил “Алтан жолоо” группийн түүх 1992 оноос эхлэлтэй. Гадаад, дотоод худалдаа, шингэн хүнсний үйлдвэрлэл, хоол үйлдвэрлэл, барилга угсралт, хөрөнгийн менежмент зэрэг олон салбарт үйл ажиллагаагаа амжилттай өргөжүүлэн хөгжүүлж, өнгөрсөн онд автомашины худалдааны чиглэлээр “Алтан Жолоо Моторс” компанийг байгуулснаар өдгөө 10 гаруй охин компанитай болж, Монгол Улсын эдийн засгийн хөгжил, бүтээн байгуулалтад бодит хувь нэмэр оруулсаар байна. 2025 оны шалгаруулалтад “Алтан Жолоо” групп 23 дугаар байрт эрэмбэлэгдэж, өнгөрсөн оноос 5 байраар урагшилсан байна. Эдний захирал боссууд сошиалд ч, гүүглд ч, амьдрал дээр ч мөр үлдээхгүй, гэрэлд цохиулахгүй амьдардаг даруухан баячууд.
АН-ын дарга О.Цогтгэрэлийн “Тэсо” групп 30 дугаар байрт эрэмбэлэгдлээ
Ядаж л хэдэн бор гишүүдээ “Скай гарден”-д амьдруулчих бэлтэй даргатай болсных АН-ын залуус өнгөлөг гэж жигтэйхэн байгаа. “Янзага” фракц хүртэл үүсгээд амжсан О.Цогтгэрэл ойгүй баян харагдах нь дүү нарын нүдэн баримжаа. Улсдаа бол мань эрийн ТЭСО групп 30 дугаарт эрэмбэлэгдэж байна. Н.Алтанхуягийн ойрын шадар байсан залуу цагийн түүхтэй ч бизнест овтойгийнх О.Цогтгэрэл одоо байр урагшилсан гэсэн үг. Улс төрөөс хэзээ ч яваа билээ, ардаа юмтай хүн бол буух газраа бодож, бордож явах нь алсдаа ашигтай.
1996 онд үйл ажиллагаагаа эхлүүлсэн “Тэсо” групп өнөөдөр “Тэсо Фүүдс”, “Тэсо Пропертис”, “Тэсо Инвестмэнт”, “Тэсо Индастриал Парк” гэсэн үндсэн дөрвөн чиглэлээр үйл ажиллагаа явуулж, 30 гаруй салбар компани, 2500 гаруй ажилтантай үндэсний хэмжээний групп болон өргөжин хөгжиж байна.
Х Богдын ээжийн компани ёслол төгөлдөр ТОП-100 жагсаалтад 21 дэх удаагаа шалгарчээ
ТОП-100 жагсаалтад “Монполимет” групп орж “Монполимет” группийн тогтвортой өсөлт, хариуцлагатай бизнесийн зарчим, хамт олны хөдөлмөрийн үр дүнг илэрхийллээ. Ойгүй баян айлын хүү Богд боллоо гэлцэх ч яг улсдаа бол тэд бүр ойгүй манлайлагч хөрөнгөлөг эгнээнд арай хүрээгүй байна. “Монполимет” өнгөрсөн онд улсын болон орон нутгийн төсөвт 30 гаруй тэрбум төгрөгийн татвар, хураамж төвлөрүүлжээ. Өнөөдрийн байдлаар группийн хэмжээнд 1000 гаруй хүнийг тогтвортой ажлын байраар хангаж буй тус групп олон улсын түвшинд Азийн нэр хүндтэй Asia Corporate Excellence & Sustainability Awards (ACES)-аас “Азийн аж үйлдвэржилтийн манлайлагч” шагналыг хүртсэн. Тэд урагшилж л яваа.
Ц.Баатарсайхан 2025 онд улсад 724 тэрбум төгрөгийн татвар төлжээ
2025 онд “Таван богд” группийн гэр бүлийнхэн хэвлэлийн нүүр хуудсыг дүүргэн байсан нь яг нэг жилийн өмнөх явдал. Хүү нь хэрэг төвөгт орооцолдоод байсан ч шуугианыг бол намжаах шиг болж шүүхийг ч цэвэрхэн шийдсэн. Аргагүй шүү дээ. Энэ онд Монгол Улсын Засгийн газар, МҮХАҮТ-аас хамтран жил бүр зохион байгуулдаг Монгол Улсын ТОП-100 аж ахуйн нэгжээр “Таван Богд” группийн 6 охин компани, 1 хөрөнгө оруулалттай компани шалгараад байна. 2025 онд ТОП-100 аж ахуйн нэгжүүд улсын ДНБ-ий 73 хувийг бүрдүүлсэн бол “Таван Богд” групп, ХААН банкны хамтаар улсдаа 724 тэрбум төгрөгийн татвар төлж, ДНБ-ий 5.6 хувийг дангаар бүрдүүлсэн гэдэг том тоо. Ц.Баатарсайхан ийм хөрөнгө чинээтэй байхад хүүгийн зодооны асуудал бол хумсын чинээ жижиг асуудал байх нь аргагүй юм байна.
У.Цахирмаа
Сэтгэгдэл байхгүй байна