Их Британийн хааны гэр бүлийн хамгийн дурсамжтай, халуун дулаан агшнуудыг гэрэл зурагт буулгадаг арга хэмжээний нэг бол яах аргагүй Trooping the Colour ёслол юм. Их Британийн хааны албан ёсны төрсөн өдрийг тэмдэглэдэг энэхүү жил тутмын ёслол нь Диана гүнжийн гайхалтай хувцаслалт, ханхүү Харри болон Меган гүнгийн авхайн сэтгэл хөдөлгөм мөчүүд, мөн ханхүү Луисын агаарын үзүүлбэрийг харах үеийн өхөөрдөм төрх зэрэг олон мартагдашгүй агшныг дэлхий нийтэд хүргэсээр ирсэн. Харин энэ жилийн ёслол ч мөн адил олны анхаарлыг татаж чадлаа.
Хаан III Чарльзын хаанчлалын үеийн дөрөв дэх удаагийн Trooping the Colour ёслолд хаан хатан Камиллагийн хамт оролцсон бөгөөд тэрээр нөхрийнхөө нэгэн адил цэргийн хэв маягаас сэдэвлэсэн хувцсаар гоёжээ.
Энэхүү загварыг түүний олон жилийн турш хамтран ажиллаж буй дизайнер Фиона Клэр урласан бөгөөд хатан хаан болсныхоо дараа 2023 онд болсон анхны Trooping the Colour ёслолд мөн өмсөж байсан юм. Энэ удаа тэрээр хорооны энгэрийн тэмдгийг зүүж, цагаан өдтэй хар өнгийн Philip Treacy берет малгайгаар дүр төрхөө бүрдүүлжээ.
Ханхүү Уильям, гүнж Кейт болон тэдний гурван хүүхэд Чарльз, Камилла нартай хамт Букингемийн ордны тагтан дээр гарч ирсэн байна. Кейт өргөн хүрээтэй Philip Treacy малгай өмсөж, цагаан эмжээртэй цайвар хөх өнгийн Catherine Walker брэндийн даашинз-пальтогоор гоёсон нь талийгаач Диана гүнжийг санагдуулам сонголт байлаа.
Түүний хөвгүүд болох ханхүү Жорж, ханхүү Луис нар ижил өнгийн цайвар хөх зангиагаар хосолсон бол гүнж Шарлотт цагаан эмжээртэй даашинзаар гангарчээ. Ээжийнхээ хэв маягаас санаа авсан 11 настай гүнж үсээ хагас задгай, хагас боосон байдлаар янзалж, том туузаар чимэглэсэн байв.
Сэтгэгдэл байхгүй байна