БСШУСЯ-ны газар, нэгж, харьяа байгууллагуудын удирдлагын нэгдсэн хурал боллоо. Хурлаар Боловсролын хүрээлэнгээс монгол хүүхэд, залуучуудын шалгуур үзүүлэлт, XXI зууны монгол суралцагчийн компетенцийн загвар гэсэн хоёр судалгааны үр дүнг танилцуулсан юм.
Тухайлбал, хүүхэд залуучуудын шалгуур үзүүлэлтийг тодорхойлох цогц судалгааг Монголд анх удаа хийснээ Боловсролын хүрээлэнгийн эрдэмтэн, судлаачид танилцуулав. Энэхүү судалгаанд 6-21 насны хүүхэд, залуучуудыг хамруулан тэдний танин мэдэхүйн болон нийгэмшил, бие бялдрын чадамжууд ямар байгааг судалж тогтоожээ.
Үндэсний хэмжээнд хийсэн уг судалгаанд тулгуурлан монгол хүүхэд, залуусын шалгуур үзүүлэлтийг боловсруулсан байна. Нас наснаас 260-265 хүүхэд, залуусыг сонгон хамруулсан энэ судалгаагаар монгол хүүхэд, залуусын анхаарал төвлөрүүлэх чадвар дунджаас доогуур байна гэсэн дүгнэлтэд хүрчээ. Харин монгол хүүхэд, залуусын нийгэмшлийн хөгжил нь танин мэдэхүйн болон бие бялдрын хөгжил, чадамжтай нь харьцуулахад дээгүүр байгаа аж.
Монгол хүүхэд, залуусын шалгуур үзүүлэлтийг тодорхойлох судалгааг гурваас доошгүй удаа тодорхой давтамжтайгаар хийж байж монгол хүүхэд, залуусын хөгжил ямар байгааг нарийвчлан тодорхойлох юм байна. Судалгааны үр дүнд ерөнхий боловсролын сургуулийн биеийн тамирын хичээлийн чанарыг сайжруулах, сурагчдын уян хатан байдал, тэвчээр, хүч чадлыг хөгжүүлэхэд анхаарах, тэдний танин мэдэхүй, нийгэмшил, бие бялдрыг нь хөгжүүлэх талаар цогц бодлого боловсруулах ажээ.
Боловсролын хүрээлэнгээс эрхлэн хийсэн өөр нэг судалгаа нь “XXI зууны хүүхдийн компетенцийн загвар” юм. Боловсролын хүрээлэн болон МУИС, МУБИС-ийн эрдэмтэд, бие даасан судлаачдын хамтарсан баг уг судалгааг хийсэн байна. Энэ судалгааны хүрээнд шинэ зууны Монголын хүүхэд, залуучуудын хөгжлийн загварыг гаргажээ. Тухайлбал, 2030 онд Монгол Улс боловсролын ямар үйлчилгээг иргэддээ хүртээснээр ямар иргэнтэй болох вэ гэсэн асуултад энэхүү судалгаагаар хариулт өгсөн байна.
Эх сурвалж: БСШУСЯ
Сэтгэгдэл байхгүй байна