Ерөнхий сайд асан Н.Алтанхуягийн эхнэр Э.Сэлэнгэ болон төрсөн дүү Н.Наранцэцэг нарын хилээр гарах эрхийг хориглоод буй. Түүгээр ч барахгүй Н.Наранцэцэг болон Н.Алтанхуягийн төрсөн эгчийнх нь охиныг ШШГЕГ-ын харьяа цагдан хорих 461 дүгээр ангид саатуулаад байгаа юм.

Н.Наранцэцэгт албан тушаалаа урвуулан ашигласан хэргээр эрүүгийн хэрэг үүсгээд буй. Харин Э.Сэлэнгэд ямар нэгэн хэрэг үүсгээгүй. Түүний дансаар их хэмжээний мөнгө шилжиж орж ирсэн тул ийнхүү тайлбар авах гэж байгаа гэж эх сурвалж мэдээлж байсан юм. Тэгвэл Ерөнхий сайд асан Н.Алтанхуяг энэ талаар тайлбар өгчээ. Тэрбээр “Манай эхнэрийг арван хэд хоногийн өмнө хилээр гаргахыг хориглосноос хойш нэг ч удаа дуудаж асуухгүй байгаа. Энэ хэрэг хийсэн хүний тухай биш зүгээр л Н.Алтанхуягаар оролдоод байгаа байхгүй юу. Монголын төрд ажиллаж байсан Ерөнхий сайд хүний хувьд хэлэх юм гэж байна хэлэхгүй юм гэж байна. Би хэлэхгүй юмаа бол хэлэхгүй байгаа шүү. Гэхдээ надад дахиад хэлэх юм маш их байгаа” гэлээ.

Тэрбээр энэ сарын эхээр мэдээлэл хийж Монгол Улсын Ерөнхийлөгчид нэр дэвших гэж байгаагаа зарласан. Ингэхдээ Ерөнхийлөгчид нэр дэвших гэж байгаатай холбогдуулан улстөрийн дайралтууд ирнэ гэж мэдээлж байсан юм.

Ингээд Ерөнхий сайд асан Н.Алтанхуягийн "Хар хайрцаг" нэвтрүүлэгт оролцох үеэр хэлсэн онцлох 10 ишлэлийг хүргэж байна. 

1. Би идэж уучихсан бол намайг шалгаж болно. 

2. Би суудал боддог хүн биш ээ. Би юмаа худалдаж иддэг хүн биш. 

3. Хөөрхий миний дүүг аваачаад шоронд хийчихсэн. Миний ах дүүг бүгдийг нь хийсэн ч даваад гарна. Та харин хоёр гурван хүн аваачаад шоронд хийчхээр буугаад өгчих юм биш биз дээ гэж хэлсэн. 

4. Эрээ цээрээ алдаж өрсөлдөгчөө намнадаг юм руу орчихсон. 

5. Манай эхнэрийг хилээр гарахыг хориглосон.Эхнэрийг маань нэг ч удаа дуудаж тайлбар аваагүй. Энэ зүгээр л  Н.Алтанхуягаар оролдоод байгаа байхгүй юу

6.Чингисийн Монголчуудын  цөөхөн хүмүүс баяжиж, олонхи нь ядуурч амьдарна гэж байхгүй. 

7.Н.Алтанхуягаа чи засгийг барьдаггүй л байхгүй юу, бид засгийг барьдаг гэж бүлэглэл надад хэлж эхэлсэн. 

8.Хүнийг гэм буруугүй байхад нь гэм буруутай гэж цоллодог, олон нийтийн дунд гутаан доромжилдог ийм муухай юм технологи болж тогтлоо. 

9..Намайг огцруулсан манай намын гишүүдийг би буруутгадаггүй. Үүнийг зохион байгуулсан бүлэг бүлэглэл, магадгүй Ерөнхийлөгч Ц.Элбэгдоржийн оролцоотой хийгдсэн зүйл.

10.Би нэг хэсэг бүлэглэлийн, хэдэн мөнгөтэй хүмүүсийн, бусдыгаа дээрлэхдэг, дээрэлхэхдээ хууль хяналтын байгууллагыг ашигладаг би ийм юмыг дэмжих гэж төрөөгүй.

Д.Дуулим

Д.Дуулим