МУСТА, дуучин Д.Жавхаасайхан, Д.Үүрийнтуяа нар өнгөрсөн баасан гарагийн үдэш "Хүсэл авай" тоглолтоо үзэгч түмэндээ өргөн барьсан юм. Аргагүй л ардын болон уртын дууг хэрхэн зангараг харуулан дуулдагийг утга төгс харуулдаг хосуудын тоглолт эхэлснээсээ хойш дуусан дуустлаа үзэгчдийг суудлаас өндөлзүүлж, сэтгэл юуг нь хөвсөлзүүлсэн болж өнгөрлөө.
Тоглолт эхлэхээс цагийн өмнө "Бөхийн өргөө"-ний заал бараг дүүрчихсэн байсан гэж болно. Яг цагтаа эхэлсэн тоглолтыг тэсэн ядан хүлээсэн үзэгчдийн ихэнх нь үндэсний дээл хувцсаар гоёж ирсэн байв. Түүгээр ч барахгүй дуучин Д.Жавхаасайханы үнэнч фэнүүд бололтой хэд хэдэн үзэгчид үндэсний дээл хувцсаа бүрэн дүүрэн өмсчихсөн, малгай юуг нь өвч дуурайлгаж өмсөж ирсэн нь сэтгүүлч бидний нүдэнд тун содон туссан юм. Дуулсан дуу бүрийг нь нэг бүрчлэн даган дуулж нэгэн үдшийг сэтгэл юугаа баясгасан үзэгчид завсаргүй алга нижигнүүлэн ташиж, суудлаасаа байн байн өндөлзөж байсныг бид дурандаж амжсан нь энэ.
Сонирхол татаж үзэгчдээс өндөр үнэлгээ авсан нэг зүйл бол хос дуучид маань номер бүр дээрээ нүд унагам үндэсний дээл хувцсыг өнгө алаглуулан өмссөн явдал. Товчхондоо тэд энэ удаад уран бүтээлчийн хувьд эрийн цээнд хүрснээ тунхагласан юм. Ардын болоод мэргэжлийн дууг хэрхэн уран нарийн дуулж, хэрхэн гоёл сэлтийн донж маягийг тохируулж, үүгээрээ үзэгчдээ ямархан түвшинд хүндэтгэж, дээдэлдэг болохоо батлан харууллаа.
Үндэсний урлаг, язгуур соёл гэдэг хэрхэвч мартаж үл болох, үр хойчдоо өвлүүлэн үлдээх учиртай үнэт зүйл буй. Чухам энэ үнэт зүйлийг орчин цагийн хөрсөнд буулгаж, орчин цагийн өнгө дизайнтай хослуулж явж байгаагаараа тэд үнэ цэнэтэй уран бүтээлчид гэдгийг энд онцлон дурдах нь зүй болов уу. Монгол сонгодог, этник урлагийн сүр хүч, шүншиг юу оршсон тоглолт үзэгч фенүүдийнх нь эргэн хоргодсон сэтгэл дунд өндөрлөсөн халуун дулаахан үдэш дахин дахин давтагдаасай. Энэ зөвхөн миний бус нийт үзэгчдийн хүсэл авай байсан болов уу.
Эх сурвалж: www.grandnews.mn
Сэтгэгдэл (10)