Энэ цаг үеийн поп хөгжмийн хатан хаан бол гандан бууршгүй Мадонна гэдэгтэй та ч бас санал нэгдэх байх. Одоо 53 настай дуучин эмэгтэй гайхаж бахдамаар чанга, сайхан биетэй. Нэгэнт охин байхаа больсон ч өөрийнхөө нээсэн хувцасны Material Girl маркаар нэрлэгдэх болсон тэрээр мөнхийн залуу явах шидэт ус хүртсэн юм шиг л жилээс жилд өнгөжсөөр байгаа. Гэвч мөнхийн залуу хатагтайн жинхэнэ насыг илчлэх нэг гай байгаа нь түүний үрчлээтэж, судас нь тодорсон хоёр гар. Амьдралынхаа ихэнх хугацааг өдрийн дөрвөн цагийн шаргуу дасгал сургуулилт, байнгын хатуу чанд хоолны дэглэмтэй өнгөрүүлсний ач тусаар Мадонна хорин тавт шиг чанга сайхан бие галбиртай байдаг ч энэ аймаар, золигийн гар л түүний гоо сайхныг гутааж ирлээ. Мэдүүштэй нэг зүйл гэвэл хэт эрчимтэй, шаргуу дасгал сургуулилт нь бие махбодын цусны урсгалыг хэд дахин нэмэгдүүлдэг учраас гарын судаснууд тодордог байна. Мөн хүний нас нэмэгдэх тусам арьсны доорхи өөх багасч, яс болон цусны бүтэц илүү тодорч харагддаг аж. Хорвоогийн жам л юм хойно хөгшрөлтийн энэ зовлон попын хатан хааныг ч дайрсангүй.
Английн “Mirror” сонинд бичсэнээр Мадонна гарныхаа гадна талын товойсон судаснуудыг арилгах зориулалттай, нэг удаа тарихад л 3000 долларын үнэтэй “scierotherapy” гэгдэх курс эмчилгээг нэлээд удаан хугацааны туршид хийлгэсэн гэнэ. Харамсалтай нь, уг курс эмчилгээ төдийлөн үр дүнгээ өгөөгүй бололтой. Угаас гарны пластик мэс ажилбар хамгийн төвөгтэй, үр дүн муутай байдаг гэлцдэг. Юутай ч, хатагтай Мадонна хөгширсөн гараа бээлийгээр л хаах нь шилдэг арга гэдгийг ойлгосон бололтой. 2007 оноос хойш тэрээр энд тэндгүй хар, улаан, торон, арьсан гээд төрөл бүрийн бээлийгээр гараа нуух болжээ. Улаан хивсний ёслолууд дээр тэрээр гараа нуруундаа үүрч зургаа авахуулах хандлагатай болсныг ч дэлхийн бүхий л сониуч хар, шар хэвлэлүүд онцлон бичиж, гэрэл зурагчид ч дуучин эмэгтэйн гар луу дурангаа татан чиглүүлэх болсон. Гар, хүзүү хоёр эмэгтэй хүний насыг чин үнэнээр нь хэлдэг гэдэг дээ. Үнэхээр супер од байхын хэцүү нь энд л байх юм.
Манайдаа л мөнхийн залуу нас, үл хөгшрөх гоо сайхныг тунхаглаж яваа топ модель Э.Одгэрэлийн “шүдний өвчин” бас л өнөөх гайхал гар. Бие хаа, арьс үсний гоо сайхан гээд юм юмаараа Э.Одгэрэл энэ зууны биднийг бишрүүлж байгаа. Харин түүний гар тав, зургаан жилийн өмнөөс сэтгэлийг нь зовоож эхэлсэн бөгөөд айхтар, чамбай хатагтай янз бүрийн арга хэмжээ авч хаа очиж хэвийн хэмжээнд нь барьсаар байгаа. Харин Мадоннагийн насан дээр попын хатан хаантай ижилхэн болчихгүй бол ч...Тэрээр сурталчилгааны зураг авахуулахдаа бас тайзан дээр зогсохдоо гараа эвтэйхэн нь аргагүй нууж чадсаныг бид харж байна.
Эмэгтэй хүний гар нийгмийн статусыг нь, хүзүү насыг нь илтгэдэг гэдэг ишлэл ч бий. Нөгөө талаар галзууртлаа хөгжиж буй косметик мэс заслын шинжлэх ухаан гарын арьсны гоо сайхныг л аварч чадахгүй ирсэн нь зовлонтойёо.
Эх сурвалж: "Гранд" сэтгүүл
Сэтгэгдэл (25)