"Нүүрс" хөтөлбөрийг хэрэгжүүлэхдээ их хэмжээний мөнгө завшиж улсад онц, их хэмжээний хохирол учруулсан хэмээн буруутгагдаж байгаа Л.Гансүх нар давж заалдах шатны шүүхийн шийдвэрийг эсэргүүцэж Улсын дээд шүүхэд хандсан юм. Тэгвэл Улсын дээд шүүхийн хурал энэ сарын 10-нд болно гэсэн тов гараад байна. Ерөнхий сайд Н.Алтанхуягийн ахлах зөвлөхөөр ажиллах хугацаандаа ийм асуудалд орсон Л.Гансүх өөрийгөө буруутай гэж үздэггүй. Тэрчлэн энэ удаагийн шүүх хуралд өөрийн биеэр оролцох  хүсэлтээ гаргажээ.Түүний өмгөөлөгч Ц.Баасандорж хэлэхдээ  "Давж заалдах шатны шүүх хуралд Л.Гансүх гуайг өөрийг нь байлгалгүй алсын зайнаас онлайнаар холбогдоод шүүчихсэн. Харин энэ удаа өөрийн биеэр шүүх хуралд оролцох хүсэлтэй байгаа. Давж заалдах шатны шүүх хурал дээр нэг шүүгч тусгай санал гаргасан. Энэ саналыг шүүгдэгчийн өмгөөлөгчид одоог хүртэл танилцуулаагүй. Танилцах боломж өгөхгүй байна. Мөн Улсын дээд шүүхийн хурлын процесыг олны нүдэн дээр ил, тод шийдвэрлэх хэрэгтэй. Үнэ, жингийн зөрүүгээр хүнийг яллаж болдог эсэхэд жишиг тогтоох шүүх хурал болно. Гэхдээ анхнаасаа олны дунд байж, маш олон эргэлзээг төрүүлсэн энэ хэрэг ард түмний хяналтан дор шийдэгдэх ёстой. Шүүх ил, тод нээлттэй, үйл ажиллагаагаа ард түмнээсээ нуухыг хүсэхгүй байгаа юм бол шүүх хурлыг үзэх, ажилд нь дүн тавих эрхийг ард түмэнд олгох ёстой" гэсэн байна. Тэгэхээр Л.Гансүх ард түмний өмнө шүүгдэж үнэн мөнөө тогтоолгохыг хүсч байгаа ажээ.

М.Мөнхжин