Хариуцлагатай албан тушаал хашиж байгаа хүнээс хариуцлага нэхэх нь зүй ёсны хэрэг. Тиймээс ч Баянзүрх дүүргийн Засаг дарга Д.Пүрэвдаваа өөртэй нь холбоотой гараад байгаа анхаарал татсан мэдээллүүдэд албан ёсны тайлбар хийх ёстой юм. Баянзүрх дүүргийн АН-ын дарга тэрээр тус дүүргийн Засаг даргаар сонгогдсоноосоо хойш чамгүй хэл ам таталж байгаа. Түүнийг ажилчдаа дарамталж, дур зоргоороо халж солиод зогсохгүй, оролдож, ажлаас нь халж, татвар төлөгчдийн мөнгийг намдаа хандивлуулж эхэлсэн гэх мэдээлэл хэвлэлд гараад байгаа юм.

Түүний хариуцлагагүй үйл ажиллагаанаас болж эрхээ зөрчүүлсэн иргэд АТГ болон шат, шатны шүүхэд хандаад тусыг эс олсон тул бүгд нийлээд “Нийтийн эрхийг хамгаалах холбоо”-д хандсан гэх мэдээлэл байна. БЗД-ийн Засаг даргын тамгын газар буюу Д.Пүрэвдаваагийн шууд удирдлаганд ажиллаж байсан 15 хүн өчигдөр хууль эрхзүйн туслалцаа хүссэн аж. Тэдгээр иргэдийн нэг  БЗД-ийн 27-р хорооны ИНХ-ын дарга Ц.Дулмаа хэлэхдээ Д.Пүрэвдаваа өөрийнх нь эсрэг тэрсэлдсэн үндэслэлээр ажлаас нь үндэслэлгүйгээр халж, эсэргүүцэхэд нь хүн хөлсөлж бага насны охинтой нь хамт зодуулсан гэх гомдлыг БЗД-ийн Цагдаагийн II хэлтэст гаргасан ч хэрэгсээгүй гэх зүйлийг ярьсан байна. Бусад иргэдийн тухайд ч Д.Пүрэвдаваа гэж хүн өөрсдийнх нь эрхийг зөрчсөн гэж үзэж байгаа аж. Тиймээс Д.Пүрэвдаваа дарга тайлбар хийх ёстой болж байна.

М.Мөнхжин