Монголын улс төрийн намуудад улс орны эрх ашиг бус засаг төрийн эрх мэдэл хамгийн чухал гэдгийг гэрчилдэг зүйл бол сонгууль дөхөхөөр шинэ хамтрагчаа хайж эхэлдэг явдал юм. өнгөрсөн сонгуулиар МАХН-тай нийлж, УИХ-д эвсэл байгуулсан МҮАН энэ удаадаа АН-тай дотносохоор болсон. Тиймээс Н.Энхбаярын МАХН-д гайгүй сайн түнш хэрэгтэй болж, улмаар Монголын Ногоон Намтай хамтрахаар болоод байгаа билээ. Уг нь МАХН-ыг үндсэн угшил болох МАН-тайгаа хамт сонгуульд орно гэх бор шувуу зөндөө ниссэн. Гэхдээ одоогоор тодорхой болоогүй байна.

Ямартай ч, Сонгуулийн тухай хуулийг шинэчлэн баталснаар УИХ-ын сонгуульд оролцох намуудыг Улсын Дээд Шүүхэд бүртгүүлсэн он дарааллаар нь эрэмбэлж, саналын хуудаст бичихээр болсон юм. Тэр дагуу бол  МАХН 18-д эрэмбэлэгдэж байсан юм. За харин  Монголын Ногоон намтай хамтрах шийдвэр гаргаснаар 3 дугаарт бичигдэж таарах юм. хэрэв МАН-тайгаа нийлвэл 1 дүгээрт бичигдэх боломжтой болох юм.

Тэгэхээр МАН болоод МАХН-ын удирдагчид болох хоёр ЭНХ хамтаараа 1 дүгээрт бичигдэж, хамаг саналыг хамах сценаритай эсэх нь удахгүй тодорхой болох биз ээ.

М.Мөнхжин