МАН-ын дэргэдэх НАМЗХ-ны тавдугаар их хурал өнгөрөгч амралтын өдрүүдэд Тусгаар тогтнолын ордонд болж өнгөрлөө. Хуралд 400 гаруй мандатын эрхтэй төлөөлөгчид оролцсон бөгөөд дөрвөн жилд нэг удаа болдог их хурлаараа удирдах зөвлөлийн бүрэлдэхүүнээ өөрчилж, цаашдын үйл ажиллагаа, зорилт, бусад дүрмийн асуудлаа хэлэлцдэг журамтай аж. Энэ үеэр НАМЗХ-ны ерөнхийлөгчид Л.Оюун-Эрдэнэ, Г.Тэмүүлэн нарын нэрийг дэвшүүлсэн ч Л.Оюун-Эрдэнэ өөрийн хүсэлтээр нэрээ татаж авсан учир тус холбооны ерөнхийлөгчөөр Г.Тэмүүлэн сонгогдсон юм. Уул уурхайн дэд сайдын албан тушаалтай байсан Г.Тэмүүлэн нь Эрдэнэт Үйлдвэрийн Захирал асан Ч.Ганзоригийн хүү, "Ханбүргэдэй" их дэлгүүрийн эзэн Сандагын хүргэн гэдгээр нь олон нийт илүүтэй танина. Түүнийг тус холбооны ерөнхийлөгчээр сонгогдоход залуучууд шинэ ерөнхийлөгчдөө сэтгэл хангалуун байхгүй байгаагаа уламжилж хурлын үеэр ширүүхэн маргаан үүссэн байна.

Хурал болох сургаар л МАН-ын залуучууд хоёр талцан, ширүүхэн дайтсаны эцэст ийн “олигархи” хүчин буюу УИХ-ын гишүүн Н.Номтойбаяр, О.Содбилэг, Г.Тэмүүлэн тэргүүтэй хүмүүс ялалт байгуулсан байна. Холбоо дотроо “ардын" буюу Л.Оюун-Эрдэнийн тал, “олигархи” буюу Н.Номтойбаярын тал хэмээн хоёр хуваагдчихсан байсан нь эртний явдал. Харин олигархи уу, ардын хүүхдүүд ялах уу гэх асуултын тэмдэг хариулттай болсон нь энэ юм. Хамгийн сонирхолтой нь НАМЗХ-г өнөөдрийн энэ хямралд хүргэж, залуусыг хоёр талцуулсан их дайнд аваачсан гэгдэх НАМЗХ-ны шинэ ерөнхийлөгч Г.Тэмүүлэн яажшуухан тус холбоог удирдаж авч явах вэ гэдэг бас анхаарал татах сэдэв болж үлдлээ хэмээн хэвлэл мэдээллийн хэрэгсэлээр анхаарал татсан сэдэв хэвээр үлдлээ. 

Ямартай ч ГОК буюу Монголын уул уурхайгаас төрөн гарсан тэрбумтнуудын хүүхдүүд болох УИХ-ын гишүүн Г.Тэмүүлэн, О.Содбилэг, Н.Номтойбаяр нар МАН-ын залуучуудын хүчин НАМЗХ-г удирдахаар боллоо.

Эх сурвалж: www.grandnews.mn