Тавантолгойн нүүрсний ордод хөрөнгө оруулагчаар шалгарсан талтай хэлэлцээ хийх ажил  эхэллээ.  Тус хуралд Ажлын хэсгийн ахлагч Монгол Улсын сайд М.Энхсайхан, Уул уурхайн сайд Р.Жигжид, Зам тээврийн сайд Н.Төмөрхүү болон Ажлын хэсгийн гишүүд, хөрөнгө оруулагч Консерциумын талаас Энержи Ресурс ХХК-ийн гүйцэтгэх захирал Г.Батцэнгэл,  дэд захирал Л.Оюунбат, China Shenhua Overseas Development & Investment  компанийн ТУЗ-ын дарга Шао Жүнжие, дэд ерөнхийлөгч Жоу Тиежүн, болон Sumitomo корпорацийн Нүүрсний хэлтсийн Ерөнхий менежерийн зөвлөх Кэйжи Кирибүчи, Монгол дахь салбарын захирал Хирото Фиживара нар оролцлоо.

 Хурлын үеэр “Эрдэнэс Тавантолгой” ХК-ийн гүйцэтгэх захирал Я.Батсуурь “Таван толгойн уурхайн үйл ажиллагаа, санхүүгийн нөхцөл байдал“-ын талаар , “Монголын төмөр зам”  ТӨХК-ийн захирал П.Батсайхан “Тавантолгой-Гашуун сухайт чиглэлийн төмөр замын ажлын явц, гэрээт компаниуд, тэдгээрийн төлбөр” болон бусад холбогдох мэдээллийг танилцуулсан юм.

 Хөрөнгө оруулагч Консерциумыг төлөөлж Энержи Ресурс ХХК-ийн дэд захирал Л.Оюунбат “Таван толгойн ордод хөрөнгө оруулах гэрээний агуулга, гэрээнд баримтлах олон улсын стандартууд” зэрэг холбогдох мэдээллийг Ажлын хэсгийн гишүүдэд танилцууллаа.

 Консерциум нь Таван толгойн нүүрсний ордод Төслийн санхүүжилт хэлбэрээр хөрөнгө оруулж, хөгжүүлэх юм. Төслийн санхүүжилт гэдэг нь олон улсын банк, санхүүгийн байгууллагуудыг төсөлд татан оролцуулах хөрөнгө оруулалтын хэлбэрийг хэлдэг.  Тиймээс  “Таван толгойн ордод хөрөнгө оруулж, хөгжүүлэх”-тэй холбоотой бүхий л гэрээ, хэлэлцээ олон улсын  стандарт, банкны шаардлага хангасан маргаангүй, ил тод байхыг шаардаж байна.