“Next stop” бол залуусын төдийгүй ирээдүйн лидерээ битүүхэн эрж хайн бэдэрдэг улс төрийн нам, хүчнийхний хамгийн их хүсэн хүлээдэг наадам юм. Гараанаас амжилт бүтээлээрээ шалгарсан 39 манлайлагч залуус гарснаас эдийн засаг, бизнесийн салбарын оны залуугаар “UFC” группийн захирал О.Амартүвшин тодорсон. Маргаангүй, харин ч ялимгүй оройтож ирсэн шагнал байж болох.
Түүнийг шагнал гардахад түрүү жилийн оны залуу Жорж Төмөр буюу Т.Лхагвадорж ноёнтон, нэгэн үед залуу маркетер О.Амартүвшингийн захирал байсан “MCS”-ийн Ж.Од захирал нар ээлж дараалан тайзнаа гарч “Хурд” хамтлагтай амьдаар дуулсан. Ёстой гэнэтийн сюрприз. Танхим дүүрэн хүмүүс бизнесч ноёдын нууц авьяасыг алмайран байсан шүү. Тэр ийм хүндлэл хүлээхүйц онцгой нэгэн ажээ. Агуу юм энгийн байдаг, энгийн юм агуу байдаг гэдгийн илрэл энэ буюу. Эгэл жирийн маркетер залууг ирээдүйд захиралтайгаа өрсөлдөхөөр шилдэг бизнесмэн болно гэж тэр үед хэр олон хүн таамаглаж байсан бол?
Жирийн маркетингийн ажилтнаас “Увс Хүнс” компанийг байгуулах хүртэл О.Амартүвшин багагүй даваа давсан. Түүний хувьд ТИС-ийн Компьютер, Техник Менежментийн Сургуулийг Бизнесийн удирдлагын бакалавр зэрэгтэй төгсөж тус сургуулийн мастерын зэргийг маркетингийн чиглэлээр хамгаалсан юм. Гадаадад төгссөн гялгар намтар, сайн эцэг эхийн шошгогүй эглээс эгэл гэр бүлээс гаралтай ард түмний хүү ийн цойлж явна.
О.Амартүвшин 2005 оноос Увс Хүнс Компаний Захиралаар ажиллаж бизнесийнхээ гарааг эхэлсэн бөгөөд UFC группийн үүсгэн байгуулагч юм. 2007 оноос UFC группийн Ерөнхийлөгч, ТУЗ-ын даргаар томилогдон ажиллаж байна. Талаар нэг байдаг ч төдий л анзаардаггүй чацаргана хэмээх амтат жимсийг дэлхийд брэнд болгох супер санаа энэ залууд төрсөн тэр өдөр гайхалтай.
Аливаа бизнес хүний төлөө, хүнд хэдий чинээ хэрэгтэй, тустай зүйл байна тэр хэрээр өргөжин дэвждэг жамтай. Ямартай ч эрс тэс уур амьсгалтай манай оронд 8 настай балчираас 80 настай буурал хүртэл чацарганын шүүсний хүчээр эрүүл мэндийн наад захын асуудлаа эмгүйгээр шийдэж хэвшлээ. Баярлалаа, О.Амартүвшин. Маш жижигхээн зүйлээс амьдралын олон өөрчлөлтүүд бий болдог билээ.
О.Амартүвшин шагнал, урамшууллын тухайд бас ч “битүү морь” биш. Түүнийг Монголын Маркетингийн Холбооноос 2004 оны шилдэг маркетер, Монголын Менежментийн Холбооноос 2011 оны шилдэг Захирал, Том Менежер шагналааар тус тус шагнаж байжээ. Харин “Next stop”-ын хүндтэй шагнал энэ хүний даруу, үргэлж хөшигний ард төлөвхөн амьдардаг тэр хаалтанд салхи сэвэлзүүлэх шиг боллоо. Түүнийг илүү олон хүн таньдаг болж, илүү их итгэл найдвар тээх нь дамжиггүй.
Урдах ажлаа чимээгүйхэн хийж явдаг зарчимч, цэгцтэй, хөдөлмөрч чанар нь түүний хоосноос баялаг бүтээх гол хөдөлгөгч хүч, нууц байсан гэж хэлж болно. “Биеэ засаад гэрээ зас, гэрээ засаад төрөө зас” гэдэгчлэн О.Амартүвшин хувийн амьдралаа ч ягштал төвхнүүлсэн чамбай нэгэн.
Бартаа саадыг туулан урагшлахдаа анхны амьдралдаа цэг тавьсан тэрбээр 2007 оны мисс Г.Гантуяатай гэр бүл болсон. Сайхан бүсгүйн зүсэнд алмайрсандаа ч биш, тэр хоёр нийтэд ил болохоос өмнө чамгүй хугацааг хамтдаа өнгөрүүлсэн байдаг. Жил дараалан бүл нэмж буй хосууд өрхийн тэргүүн нь онцгой шагнал гардах үед шинэ хүнээ угтах мөч ч ойртсоор буй.
Монголын бизнесийн салбар ийнхүү шижигнэсэн залуусаар хүрээгээ тэлж байна. О.Амартүвшин олон залууст урам зориг өгөөд зогсохгүй итгэл найдварынх нь бамбарыг асааж өглөө. Тийм ээ, хичээвэл хэн ч гэсэн амжилтанд хүрэх билээ. Тууштай бөгөөд зоригтой урагшлах аваас та ч гэсэн түүний дараа тайзан дээр зогсож байж мэдэх юм шүү.
Ардын хүү амжилт гарган манлайлж өөр нэгэн салхи сэвэлзүүлсэн сайхан наадам боллоо. Баярлалаа “Next Stop”!
Б.Ундрал
Сэтгэгдэл (13)