Иргэний нисэхийн ерөнхий газар хэмээх том  айлаас мөнгө завшсан дарга нарын хэрэг салахаа болиод байна. Ц.Даваасүрэн, Х.Болорчулуун, С.Ганбаатар гэсэн бие даагч гишүүд тус газрыг “хариуцах” болсон ч, дарга нь мөнгө завшдаг хэвээрээ. Бүр Ц.Даваасүрэн гишүүн ч ах дүүгээ ажилд оруулсан, хүмүүсийг халсан гэх мэдээлэлд холбогдоод байсан. Тэгсэн дараа нь хэвлэлийн хурал хийн ИНЕГ-ын удирдлагууд мөнгө завшдаг талаар ам нээж байсан. Ер нь тэгээд ИНЕГ-ын дарга нар мөнгө завшихаас айдаггүй нь сонин. Түүнчлэн мөнгө завшсан том толгойтой дарга нарын тухай багцлан өгүүлж байна.

.Шийтгэлээ эдэлж буй  С.Батмөнх

Хэргийг нэхэн санавал Иргэний нисэхийн ерөнхий газрын даргаар ажиллаж байсан С.Батмөнх тендер сонгон шалгаруулалт  хийх явцад танил талдаа давуу эрх олгосон, байгууллагад хэрэгцээтэй томоохон багаж төхөөрөмж, тавилга, эд зүйлсийг худалдан авахдаа хууль зөрчсөн байдаг.

Мөн “Электрон системс” компанитай хамтран их хэмжээний мөнгө угаасан ба жилдээ нэг тэрбум 400 сая, нийт найман тэрбум төгрөгийн хохирлыг улсад учруулсан гэх мэдээлэл тархаж байсан билээ. Мөнгө угаасан хэргээр зургаан жил зургаан сарын ялыг чанга дэглэмтэй хорих ангид  эдэлж байгаа.

С.Батмөнх даргыг ийнхүү шоронгийн хаалга татсаны дараа түүний орыг эзэлсэн дараачийн дарга С.Буяндалай байв.

С.Буяндалайгийн буяныг гишүүдийн ах дүү, амраг садан эдэлцгээсэн нь

Даргын суудалд С.Буяндалайг аваачсан нь гишүүд ар гэр, найз нөхдөө  ажилтай болгох гэсэн санааг өвөртөлсөн болж таарсан. Ц.Даваасүрэн гишүүн ИНЕГ-т олон жил ажилласан туршлагатай ажилтнуудыг халж арван жилийн ангийнхаа хүүхдүүдийг ажилд оруулсан бол, УИХ-ын гишүүн Х.Болорчулуун хамт морь уядаг, нутгийн найз Л.Нэргүйг ИНЕГ-ын Санхүү эдийн засгийн газрын      дарга болгожээ. Мөн ХААИС-д хамт суралцаж байсан найз Б.Ган-Очирыг Захиргаа удирдлагын газрын дарга болгосон бол эрхэм гишүүний охин Б.Хэрлэн Чингис хаан Олон улсын нисэх буудлын гадаад VIP танхимд, дүү Ч.Сэргэлэнбаатар ньТелемэдээлэл холбооны албанд мэргэжилтнээр орсон гээд тоочоод баршгүй их ээ. Харин Ц.Даваасүрэн, Х.Болорчулуун нар үгүйсгэсэн мэдээллийг өгч байсан. 

Ямартай ч эрхэм гишүүд халаа сэлгээний дарга нараа солихдоо төлөвлөсөн нүүдлээ хийж амжсан байдаг. С.Буяндалай даргын гаргасан зүй бус үйлдэл, зөрчлүүд тоогоо алдсан гэхэд болно.

Тухайлбал өнгөрсөн онд гэхэд Японы Наритагаас УБ чиглэлд нислэг үйлдсэн МИАТ ХК-ний ОМ- 0502 дугаарын рейсээр Боинг-737 онгоцны энгийн ангиллын Х эгнээнд суусан зорчигчид /шинэчлэлийн засгийн газраас томилогдсон өндөр       албан тушаалын эрхэмүүд/ архидаж нисэх багийн гишүүдийг  үйлчлэгчээр удаа дараа дуудан архи нэхсэн байдаг. Харин энэ талаар гомдол гаргасан тухайн үед зорчсон иргэдийн гомдлыг хүлээж аваагүй байна.

Мөн Хонконгоос УБ чиглэлд нислэг үйлдсэн МИАТ ХК-ний Боинг-767 онгоцыг Чингис хаан ОУНБ-д газардахаар доошлох үед буух зурвасыг чөлөөлөлгүй цас цэвэрлэгээний машин бууж байгаа онгоцыг машинтай мөргөлдүүлэх шахсан ноцтой зөрчил гаргасан. Энэ ноцтой зөрчилийг удирдлага болох С.Буяндалай тэргүүтнүүд нуун дарагдуулсан байдаг.Энэ мэт хүний эрдэнэт амь настай холбоотой ёс зүй, ажил хэргийн хурц зөрчлийг удаа дараа гаргаж байсан бүдүүн хүзүүтэй дарга гэдэг нь баримт бүхий мэдээллүүдээс харагддаг юм.

Дарга биш ч, даргын дайтай идсэн Т.Батжаргал

Тэр  ИНЕГ-ын дарга биш, харин ИНЕГ-ын Захиргаа, хүний нөөцийн удирдлагын хэлтсийн дарга. Хуучин дарга С.Батмөнхтэйгөө нийлээд гэр үйлдвэрлэдэг компани байгуулсан. Энэ нь мөнгө угаах нэг хэлбэр байж таарав.

Мөн тэрбээр Америкт оюутан сургах гэрээ байгуулсан ба 2012-2017 оны хооронд 45 оюутан сургахаар болсон байдаг. Тэрхүү 45 оюутан дотор Т.Батжаргалын эхнэр, хүүхэд, дүү, эхнэрийнх нь дүү, жолоочийнх нь хүүхдүүд хамрагдсан байдаг юм байна. Үүний дараа өөрийнх нь тухай хэвлэл мэдээллээр гарч эхлэхэд “Би хэлмэгдэж байна” хэмээн хашгичжээ. Түүний үйлдлүүдийг УИХ-ын гишүүн Ц.Даваасүрэн, Х.Болорчулуун нар илчлэн гаргасан билээ.

Хүргэнээ сургадаг дарга

ИНЕГ-ын дарга Т.Лхагвасүрэнг эсэргүүцэж З.Энхболд дарга твиттер хуудаснаа жиргэсэн билээ.Тэрбээр ИНЕГ-ын дарга Т.Лхагвасүрэн гэгч өөрийн найз нөхөд, охиныхоо найз залуу зэргийн сургуулийн төлбөрийг улсын орлогоор буюу ард түмэнд очих байсан мөнгөөр тэтгэж байсныг эсэргүүцсэн. Ажлыг хэсэг томилуулан энэ асуудлыг зохицуулахаа ч мэдэгдэж байсан удаатай.

Тодруулбал, Т.Лхагвасүрэн охин Л.Хонгорзулаа АНУ-ын Сан-Франциско хотод “Олон улсын худалдаа, бизнес”-ийн сургуульд өнгөрсөн жил байгууллагын зардлаар сургах шийдвэрт гарын үсэг зурсан байжээ. Мөн охиныхоо сүйт залуугийн сургалтын төлбөрийг мөн татвар төлөгчдийн мөнгөнөөс гаргасан байв. Хэрэг олон нийтэд зарлагдмагц тухайн тушаалаа хүчингүй болгожээ.

ИНЕГ-ын дарга нарын тухай товчхон өгүүлэхэд ийм байна. Энэ газрын даргын суудалд залрагсад бүгд мөнгөнд дуртай байж таарсан уу, дуртайдаа тэр албан тушаалд очдог уу гэдэг бас сонин. ИНЕГ-ыг ч аз ивээдэггүй бололттой, дандаа идэж ууж завшдаг дарга нар суусаар өөдлөх хувь заяа алга гэж халаглаж суух ажилчид олон.

Даргын суудалд нэр цохон суулгадаг бие даагч гишүүдэд “но” байгаа гэж яригдаж байна. Жилийн жилд дарга цэрэг нь солигддог ч хэдэн жилээр бугшсан идээ бээрийг үндсээр нь цэвэрлэх бус, улам нэмж байгаа гэхэд хилсдэхгүй.

Ямартай ч ИНЕГ-т шалгалт оруулвал зохилтой гэсэн санал шүүмжлэл газар авч байгаа юм. Шалгалт хийвэл хэдий хэмжээний мөнгө луйварчин дарга нарын хэтэвч рүү орсон нь илүү тодорхой болох биз ээ.

П.Урнаа