УИХ-ын гишүүн Д.Зоригт  хэдэн нөхдийн хамт зочид буудалд мөрийтэй тоглож байгаад баригдсан гэх мэдээлэл олны анхаарлыг татаж эхэллээ. Тэрбээр УИХ-ын гишүүн асан Д.Загджав, “Макс” группын Ерөнхийлөгч Д.Ганбаатар, Уул уурхайн яамны хэлтсийн дарга Ч.Цогтбаатар нартай хамт мөрийтэй тоглож байсан гэнэ. Эдгээр нөхдүүдэд холбогдох хэргийг хуулийнхан шалгаж байгаа гэнэ. Гэхдээ Д.Зоригтын тухайд УИХ-ын гишүүний халдашгүй дархан эрх гэж нэг тээг саадтай.  Ер нь Д.Зоригтын гишүүний тухайд сүүлийн үед чамгүй асуудалтай яваа. Өмнөд хөршийн төрийн мэдлийн Bank of China-ийн салбарыг Монголд нээх асуудлыг дэмжсэн түүнийг  Сангийн сайдад суулгах асуудал яригдсан. Түүнчлэн яг одоогоор сайд нарыг  томилох асуудал яригдаж байгаа энэ үед түүний мөрийтэй тоглоомын асуудал босч ирж таарч байгаа юм.

Д.Зоригтын тухайд “Монгол Шуудан”-гийн гэх тодотголтой төдийгөөс өдийг хүрсэн. Бизнес, улстөрийг хослуулан  өдийг хүрэхдээ хууль, журам зөрчсөн олон үйлдлийг хийсэн байдаг ч, тэр болгоноо том асуудал болгон дэгдээж газар авахуулахгүй байх тал дээр сайн ажиллаж ирээ юу гэлтэй нэгэн гэдгийг нь тодотгох нь зөв болов уу.   “Монгол шуудан” банкны хөрөнгө оруулагч байхдаа жижиг хувьцаа эзэмшигчдийн зөвшөөрөлгүйгээр хөрөнгийг нь “Хадгаламж” банкинд худалдсан тул тус банкны жижиг хувь нийлүүлэгчид энэ асуудлыг шийдвэрлүүлэхээр шат шатны шүүхэд хандсан байдаг. Улмаар гурван шатны шүүхээс “Монгол шуудан” банкны хувьцааны хяналтын багцыг барьж байсан хүмүүс нь жижиг хувь нийлүүлэгчдээсээ зөвшөөрөл аваагүй худалдсаныг тогтоосон ч, хохирогчид өнөөдрийг хүрэхдээ хохирлоо бүрэн барагдуулж чадаагүй л явцгааж байгаа аж. Мөн Монголын хөрөнгийн биржид бүртгэлтэй Гермес компанид тэрбээр их хэмжээний хувь эзэмшдэг.

Гэтэл Гермес ХХК-ийг нээлттэй хувьцаат компани болгож шинээр IPO гаргахад Санхүүгийн Зохицуулах Хороо хэд хэдэн алдаа гаргасан байдаг нь Д.Зоригт болоод Санхүүгийн Зохицуулах Хорооны дарга  Дашдондовын Баярсайхан нарын хооронд тохиролцоо байсан байж болзошгүй гэж  харахад хүргэдэг юм. Баримтуудаас  харахад УИХ-ын гишүүн  Д.Зоригт хэлж ярьж явдгаасаа тэс өөрийг хийдэг нэгэн гэж л ойлгогдоно. Өөрийн бизнесийн мөнгөний урсгалаа нэмэгдүүлэхийн тулд Санхүүгийн Зохицуулах Хорооны эрх мэдэлтнүүдтэй хуйвалдсан тэрбээр Сангийн яамыг зална гэхээр эхнээсээ л эвгүй дуулдсан. Банк дампууруулж тоглосон, сонгуулиар луйвар хийсэн,  “Номаранг”-ийн залиланг хийсэн нөхдүүдийн нэг гэхчлэн олон асуудалд холбогддог тэр ийнхүү мөрийтэй тоглоомчны хувиар тодорч мэдэх нь.

Б.Билэгт