Н.Алтанхуяг гэдэг хүн  явлаа. Шинэчлэлийн гэх тодотголтой Засгийн газар уналаа. Гээд яахав. Одоо дараагийн Ерөнхий сайд болоод бусад сайд нарын суудалд хэн хэн суух вэ гэдэг асуудал ундарна. Уг нь яг одоо бол төсөв хэлэлцэж байгаа, улс орны хувьд тун чухал үе. Тэгэхээр асуудлыг түргэхэн бөгөөд дөмөгхөн шиг шийдэх шаардлага Монголын улстөрчдийн өмнө байна. Ер нь бол улстөр гэж боломжоор тоглох урлаг гэдэгчлэн тэрхүү боломжийг хэдийнэ бусад нь  хөзөр болгочихоод сууж байгаа биз. Өнөөдөр Ерөнхий сайдыг огцруулахад  “Шонхор” фракцийн тодотголтой С.Эрдэнэ, Д.Арвин, Г.Баярсайхан, Г.Ганхуяг, С.Одонтуяа болон  МОаХ-ын Ш.Түвдэндорж, Д.Ганбат, С.Ганбаатар Ц.Оюунбаатар,  Ч.Улаан нар оролцоогүй нь цаагуураа дэглэлт явагдаж байна гэж харахад хүргэсэн.

Тэгэхээр өнгөрсөн өдрүүдэд яригдаж байсанчлан Х.Баттулгаар түрий барин чимээгүйхэн эзэрхийлэн суусан З.Энхболд Ерөнхий сайд болж, “Женко”-г шадар сайдаар тавих уу. Эсвэл Ц.Элбэгдоржтой ихэд ойртон дотноссон С.Эрдэнэ болоод “Ажнай” Д.Бат-Эрдэнэ нарын нэгийг ЕС-ын суудалд суулгах уу гэдэг асуулт гарч ирж байна. Эдгээрээс өндөр магадлалтай нь З.Энхболдыг гэж харж бас болно л доо. Ер нь бол тэр ЕС-ын суудалд суух хүслээ илчлэн тунхаглаагүй ч, учиргүй нуун дарж байсангүй л дээ. Гүйцэтгэх засаглалын тэргүүний суудал гэдэг нэг талаасаа   их мөнгөний чимээтэй хоршиж ойлгогдох учиртэй. Төрийн түмний төлөө гэх тодотголтой хэдэн зуун тэрбум төгрөгийг “засаг” залуурддаг. Хэсэг бүлгийн хувьчилсан эрх ашиг гэж юм мөнгөний үнэрээс ангид байж чаддаггүй гэдгийг энд хэлэх нь илүүц болохгүй биз. Тэгээд ч “Анти Алтангадас” гэж бүлэглэл АН дотор мэндлээд чамгүй ч удсан. Сая нэг зорилгодоо хүрэх зам нь шулуудсан ч янзтай үзэгдэнэ. “Анти Алтангадас”-тай холбоотой анхаарал татсан нэг мэдээлэл АН-ын тогооноос гадагшилж л байсан. Тэрийг энэ дашрамд эргэн нэг саная.

Юу гэхээр одоогоос дөрвөн жилийн өмнө буюу 2010 оны өвлийн нэгэн үдэш хотын төвийн нэгэн зоогийн газарт З.Энхболд, “Женко” Х.Баттулга нарын нөхөд сэм болзсон гэдэг. Тэдний ярианы гол агуулга нь  Н.Алтанхуягийг “Алтангадас”-тай нь хамт унагах.Намын даргын суудлыг нь өөрсдөө авах. Тэгэхийн тулд түүнд хамтарсан Засгийн газраас гарах шаардлага тавья” хэмээн тохиролцож, улмаар эрх мэдлийг өөрсдөдөө төвлөрүүлэх зорилго бүхий Ардчилсан хүчний холбоог байгуулж байсан байдаг. Тэр холбоонд нь МоАХ, соцдекүүд, “Зүүн хойд Ази”-ийнхан, МҮДН-ынхан, мөн Элбэгээгийн фракцийнхан багтсан түүхтэй. Тэгээд З.Энхболдыг Ардчилсан хүчний холбооны ерөнхийлөгчөөр сонгож, С.Эрдэнэ тэргүүтэй хүмүүсийг дэд ерөнхийлөгчийн суудалд суулгасан юм. Тэгээд яасан гэхээр Н.Алтанхуяг УИХ-ын 2012 оны сонгуулийн өмнө С.Батболдын танхимаас намынхантайгаа гарч, сонгуульд АН-ыг удирдан оролцсон. Нам нь ялсан. Тэр намын даргын хувиар Ерөнхий сайд болсон. Шинэчлэлийн тодотголтой  Засгийн газрын танхимд Ардчилсан хүчний холбоонд нэгдсэн Х.Баттулга, Н.Батбаяр, Д.Ганхуяг, С.Эрдэнэ нар бүгд орсон. З.Энхболд харин УИХ-ын дарга болсон. Тэр уг нь спикер болохыг хүсээгүй. Гэхдээ дүрэм журамд баригдалгүй л яахав. Харин одоо бол тэр хүслээрээ тодорч болох гээд байна. Н.Алтанхуяг гэдэг хүн явсан. Н.Алтанхуяг үг, үйлдэл нь хийтэй хүн байсан. Тиймээс ч тэр ингэж унаж байгааг үгүйсгэх аргагүй. Тиймээс дараа нь тодрох “Анти Алтангадас”-ынханд амжилт хүсээд хариуцлагатай  байхыг захимаар байна даа!

М.Мөнхжин