УИХ-ын гишүүн асан Д.Дондогт анхан шатны шүүхээс 10 жил нэг сар чанга дэглэмтэй ангид хорих ял оноосон билээ. Тэгвэл тэр өдгөө батлан даалтад гараад байгаа аж. Түүнийг  барилга барих газрын зөвшөөрөл гаргуулж өгнө гэж “Меритон” компаниас 681.6 сая төгрөг залилан авч өөрийн сонгуулийн сурталчилгаанд зарцуулж бусдад онц их хэмжээний хохирол учруулсан хэрэгт буруутгасан юм.

Харин өчигдөр давж заалдах шатны шүүх хурал болж анхан шатны шүүхээс гаргасан шийдвэрийг хянан хэлэлцээд хэргийг нэмэлт мөрдөн байцаалтад буцааж түүний бие тааруу байгаа тул эмнэлгийн магадлагаагаар батлан даалтад гаргалаа.

Шүүгчид түүнд холбогдох хэргийн мөрдөн байцаалтын ажиллагаа бүрэн бус, Эрүүгийн байцаан шийтгэх хуулийн шаардлагад нийцээгүй хэмээн үзжээ. Тухайлбал Д.Дондогийн бусадтай өгөлцөж авалцсан мөнгөний хэмжээг тодорхой тогтоох, бусдад учруулсан хохирлыг барагдуулахын тулд “Сумбар” компанийн хөрөнгийг үнэлүүлэх ёстой гэжээ.

Энэ талаар Д.Дондогийн өмгөөлөгч Б.Энхдалай  “Миний үйлчлүүлэгч анхнаасаа энэ хэрэгт ямар ч холбогдолгүй... Зээл гэдгийг өгсөн хүн нь ч мэднэ. Д.Дондог гуай өөрөө ч зээлж байгаа гэж ойлгосон. Төөрөгдөл үүсээд хэн нэгнийг залилчихсан асуудал байхгүй, анхнаасаа л мөнгө зээлнэ, буцаагаад төлнө гэсэн. Түүнээс  албан тушаалын болон бусад байдлаар хэн нэгэнд  тусална, дэмжинэ, газар олж өгнө”  гэсэн асуудал байгаагүй юм билээ” хэмээн ярьжээ.

П.Урнаа